ரயில் மோதி வாலிபர் உயிரிழந்த சம்பவம் சோகத்தை ஏற்படுத்தியுள்ளது.
கடலூர் மாவட்டத்தில் உள்ள சிதம்பரம் கொத்தங்குடி பகுதியில் இருக்கும் தண்டவாளத்தில் 20 வயது மதிக்கத்தக்க வாலிபர் ரத்த காயங்களுடன் தண்டவாளத்தில் இறந்து கிடந்தார். இதனை பார்த்த பொதுமக்கள் போலீசாருக்கு தகவல் தெரிவித்தனர். அதன்படி சம்பவ இடத்திற்கு விரைந்து சென்ற போலீசார் வாலிபரின் உடலை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.
இதுகுறித்து வழக்கு பதிவு செய்த போலீசார் நடத்திய விசாரணையில் சடலமாக கிடந்த வாலிபர் சிதம்பரம் எல்லையம்மன் கோவில் தெருவில் வசித்த சபரி(22) என்பது தெரியவந்தது. இவர் பிஎஸ்சி படித்து முடித்துள்ளார். நேற்று முன்தினம் அக்காவிற்கு பிறந்த குழந்தையை பார்த்துவிட்டு சபரி தண்டவாளத்தை கடக்க முயற்சி செய்தார். அப்போது ராமேஸ்வரம் நோக்கி சென்ற ரயில் மோதி சபரி உயிரிழந்தது தெரியவந்தது. இதுகுறித்து போலீசார் தொடர்ந்து விசாரணை நடத்தி வருகின்றனர்.