ஈரோடு மாவட்டத்தில் உள்ள கொத்தமங்கலம் வனப்பகுதியை ஒட்டி புதுப்பீர்கடவு கிராமம் அமைந்துள்ளது. நேற்று முன்தினம் இரவு 9 மணிக்கு வனப்பகுதியில் இருந்து வெளியேறிய ஆண் யானை கிராமத்திற்குள் நுழைந்து தெருவில் நடந்து வந்தது. இதனை பார்த்ததும் பொதுமக்கள் வீடுகளுக்குள்ளே சென்று கதவை பூட்டி கொண்டனர்.
அந்த யானை கிராமத்தில் ஒவ்வொரு வீதியாக நடந்து சென்றதை பார்த்த பொதுமக்கள் வனத்துறையினருக்கு தகவல் தெரிவித்தனர். அதன்படி சம்பவ இடத்திற்கு விரைந்து சென்ற வனத்துறையினர் காட்டு யானையை வனப்பகுதிக்குள் விரட்டி அடித்தனர். இதனால் அப்பகுதியில் வசிக்கும் பொதுமக்கள் அச்சத்தில் உள்ளனர்.