நடிகர் மகேஷ்பாபு தனக்கு கொரோனா இருப்பதாக தனது ட்விட்டர் பக்கத்தில் வெளியிட்டுள்ளார்.
தெலுங்கு திரையுலகின் சூப்பர்ஸ்டாரான மகேஷ் பாபுவுக்கு கொரோனா தொற்று உறுதி செய்யப்பட்டுள்ளது. தனக்கு கொரோனா பாதிப்பு இருப்பதை மகேஷ் பாபு தனது ட்விட்டர் பக்கத்தில் வெளியிட்டுள்ளார். பயப்படும் அளவிற்கு கொரோனா பாதிப்பு தனக்கு ஏற்படவில்லை என்றும் லேசான அறிகுறியுடன் மருத்துவர்களின் ஆலோசனைகளைப் பின்பற்றி வீட்டிலேயே தன்னை தனிமைப்படுத்திக் கொண்டுள்ளதாகவும் தெரிவித்தார்.
மேலும் கொரோனா தடுப்பூசி செலுத்திக்கொண்டு முழு பாதுகாப்புடன் இருந்த நிலையில் எதிர்பாராத விதமாக தனக்கு தொற்று ஏற்பட்டது. இதுவரை கொரோனா தடுப்பூசி செலுத்தாதவர்கள் உடனடியாக செலுத்திக்கொள்ளுங்கள் அது கொரோனாவின் மூலம் நமக்கு பெரிய பாதிப்பு வராமல் காக்கும் என்றும் தெரிவித்திருந்தார்.
இச்செய்தியை கேள்விப்பட்ட ரசிகர்கள் முதல் திரைப்பிரபலங்கள் வரை அனைவரும் மகேஷ் பாபு விரைவில் குணமடைய பிரார்த்தனை செய்து வருகின்றனர். நடிகர் மகேஷ் பாபு புத்தாண்டை துபாயில் தனது குடும்பத்தாருடன் கொண்டாடிவிட்டு சமீபத்தில் இந்தியா வந்தார் என்பது குறிப்பிடத்தக்கது.