கோவை மேட்டுப்பாளையம் கல்லாறுபகுதியில் கால்நடை வளர்ப்போர் அதிகளவில் எருமை மாடு மற்றும் பசு மாடுகளை வளர்த்து வருகின்றனர். இவற்றில் மேட்டுப்பாளையம் ரயில்வே கேட் பகுதியை சேர்ந்த ராஜ்குமார் இங்கு நிலத்தை குத்தகைக்கு எடுத்து விவசாயம் செய்து வருகிறார். இங்கு 40 எருமைமாடுகளை வளர்த்து, பால் கறந்து விற்பனை செய்து வருகிறார். இந்நிலையில் இவர் எருமைகளையும், மாடுகளையும் மேய்ச்சலுக்கு விடும்போது எருமைகள் மீது சிலர் ஆசிட் ஊற்றியுள்ளனர். இந்த கொடூர தாக்குதலால் 20-க்கும் அதிகமான எருமைகள் காயம் அடைந்துள்ளது. தாய், கன்று என அனைத்து கால்நடைகளுக்கும் தலை பகுதி, முதுகு, கால் என அனைத்து பகுதிகளிலும் காயம் ஏற்பட்டு ரத்தம் வழிந்துவருகிறது.
இது தொடர்பாக தகவலறிந்த கால்நடை பராமரிப்புதுறையினர் மற்றும் வருவாய்த்துறை , காவல்துறை என அரசு அதிகாரிகள் அங்கு விரைந்து தற்போது அது பற்றி விசாரணை மேற்கொண்டு வருகின்றனர். இதற்கிடையில் ஆசிட் வீச்சின் காரணமாக கடுமையான பாதிப்புக்குள்ளாகியுள்ள மாடுகள், உணவு உட்கொள்ள முடியாமல் சிரமப்பட்டு வரும் சூழ்நிலையில், எருமை மாட்டிற்கு தீவிர மருத்துவ பரிசோதனை செய்யப்படுகிறது. இது தொடர்பாக மேட்டுப்பாளையம் போலீஸ் நிலையத்தில் புகார் அளித்துள்ள நிலையில், புளுகிராஸ் மற்றும் மாவட்ட கால் நிர்வாகம் இந்த செயலில் ஈடுபட்ட நபர்கள் மீது உரிய நடவடிக்கை மேற்கொள்ள வேண்டும் என உரிமையாளர் தெரிவித்துள்ளார். இதனால் சுமார் 30 லட்சத்திற்கு மேலாக நஷ்டம் ஏற்பட்டு இருப்பதாக கூறப்படுகிறது.