சப்-இன்ஸ்பெக்டர் மிரட்டியதால் மேல்பாடி காவல் நிலையம் அருகில் வாலிபர் பெட்ரோல் ஊற்றி தீக்குளித்து கொண்டார்.
வேலூர் மாவட்டம், திருவலம் அருகில் குகையநல்லூர் காலனியில் வசித்து வருபவர் சரத் (26). இவர் நெல் அறுவடை செய்யும் இயந்திரம் வைத்து தொழில் பார்த்து வருகின்றார். இந்நிலையில் மேல்பாடி காவல் நிலையத்தில் பணிபுரியும் சப்-இன்ஸ்பெக்டர் கார்த்திக் என்பவர் தன்னை அடிக்கடி மிரட்டி வருவதாக கூறி மேல்பாடி காவல் நிலையம் அருகில் தனது உடலில் பெட்ரோலை ஊற்றி தீ வைத்துக் கொண்டுள்ளார்.
இதனால் அவர் உடல் முழுவதும் தீப்பற்றியது. இதை பார்த்து அருகில் இருந்தவர்கள் ஓடிவந்து தீயை அணைத்து படுகாயமடைந்த சரத்தை மீட்டு வேலூர் அரசு ஆஸ்பத்திரிக்கு அனுப்பி வைத்துள்ளனர். இது குறித்து காட்பாடி துணை போலீஸ் சூப்பிரண்டு பழனி, பொன்னை போலீஸ் இன்ஸ்பெக்டர் மனோன்மணி ஆகியோர் விசாரணை மேற்கொண்டு வருகின்றனர்.
மேலும் சரத் தீக்குளித்து தற்கொலைக்கு முயன்றதால் அவரது உறவினர்கள் இதற்கு காரணமான சப்-இன்ஸ்பெக்டர் கார்த்திக் மீது உரிய நடவடிக்கை எடுக்க வேண்டும் என்று கோரி மேல்பாடிகாவல் நிலையம் முன் சாலைமறியல் போராட்டம் செய்தனர். அவர்களை காவல்துறையினர் சமாதானம் செய்து அனுப்பி வைத்தனர். இதனால் அப்பகுதியில் பெரும் பரபரப்பு ஏற்பட்டுள்ளது.