தமிழ் சினிமாவில் முன்னணி நடிகராக வலம் வருபவர் தனுஷ். இவர் நடிகராக மட்டுமில்லாமல் தயாரிப்பாளர் பாடகர் என பன்முகங்களை கொண்டவர். சமீபத்தில் இவர் நடிப்பில் வெளியான திருச்சிற்றம்பலம் படம் ரசிகர்களின் வரவேற்பை பெற்று அதிக வசூலை குவித்தது. அதனைத் தொடர்ந்து இயக்குனர் செல்வராகவன் இயக்கத்தில் நடிகர் தனுஷ் ‘நானே வருவேன்’ என்ற படத்தில் நடித்துள்ளார். இந்த திரைப்படத்தில் நடிகர் தனுஷ் இரட்டை வேடத்தில் நடிக்கிறார். அவருக்கு ஜோடியாக நடிகை இந்துஜா ரவிச்சந்திரன் நடிக்கிறார். மேலும் யோகி பாபு, பிரபு, எல்லி அவுரம் என்ற ஸ்வீடன் நாட்டு நடிகை உள்ளிட்ட பலர் முக்கிய கதாபாத்திரத்தில் நடிக்கின்றனர். இந்த படத்தை வி கிரியேசன்ஸ் சார்பில் கலைப்புலி எஸ்.தானும் தயாரித்துள்ளனர். யுவன் சங்கர் ராஜா இசை அமைத்த இந்த படத்திற்கு ஓம் பிரகாஷ் ஒளிப்பதிவு செய்துள்ளார்.
மேலும் புவன் சீனிவாசன் படத்தொகுப்பு செய்கிறார். இந்த திரைப்படம் இந்த மாதம் திரையரங்குகளில் வெளியாகும் என்று படக்குழு அறிவித்திருந்தது. இந்நிலையில் இப்படத்தின் ரிலீஸ் தேதி குறித்து அறிவிப்பு வெளியாகி உள்ளது. அதன்படி ‘நானே வருவேன்’ திரைப்படம் செப்டம்பர் 29ஆம் தேதி திரையரங்குகளில் வெளியாக உள்ளது. இதனை நடிகர் தனுஷ் தனது சமூக வலைதள பக்கத்தில் போஸ்டர் ஒன்றை வெளியிட்டு அறிவித்துள்ளார். தொடர்ந்து தனுஷ் படத்தின் அறிவிப்புகள் வெளியாகி வருவதால் ரசிகர்கள் உற்சாகத்தில் உள்ளனர். மேலும் இயக்குனர் வெங்கி அட்லூரி இயக்கத்தில் நடிகர் தனுஷ் நடித்துள்ள வாத்தி திரைப்படம் வருகின்ற டிசம்பர் 2ஆம் தேதி திரையரங்குகளில் வெளியாக உள்ளது என்பது குறிப்பிடத்தக்கது.