தமிழகத்தில் ஏப்ரல் 6-ஆம் தேதி சட்டமன்ற தேர்தல் நடைபெற உள்ளது. அதனால் அனைத்து கட்சிகளும் தீவிர தேர்தல் பிரசாரத்தில் ஈடுபட்டு வருவதால் தேர்தல் களம் சூடு பிடிக்க தொடங்கியுள்ளது. ஒவ்வொரு கட்சியினரும் தங்கள் எதிர்கட்சியினரை கடுமையாக விமர்சித்து தேர்தல் பிரசாரம் செய்து வருகிறார்கள். அதிலும் குறிப்பாக அதிமுக மற்றும் திமுக இடையே கடும் மோதல் போக்கு நிலவி வருகிறது. இதற்கு மத்தியில் சட்டமன்ற தேர்தலில் போட்டியிடும் வேட்பாளர்கள் பட்டியலை ஒவ்வொரு கட்சியும் வெளியிட்டு வருகிறது.
மறுபக்கம் மக்களைக் கவர அனைத்து கட்சியினரும் மக்களிடம் நேரடி தேர்தல் பிரசாரத்தில் களமிறங்கியுள்ளனர். இந்நிலையில் நாகை தொகுதியில் அதிமுக வேட்பாளர் தங்க கதிரவன் துணிகளை துவைத்து கொடுக்கும் வீடியோ ஒன்று வைரலானது. இதையடுத்து அதேபோன்று விருகம்பாக்கத்தில் திமுக வேட்பாளர் பிரபாகரன் ராஜா தோசை ஊற்றும் வீடியோ வைரலாகியுள்ளது. எனவே மக்கள் இவர்கள் ஓட்டுக்காக எதுவும் செய்யக் கூட தயங்க மாட்டார்கள் என்று கூறி வருகின்றனர்.