தமிழ்நாட்டில் கொரோனா நிலவரம் குறித்தும், முன்னெச்சரிக்கை நடவடிக்கைகள் குறித்தும் முதலமைச்சர் மு.க. ஸ்டாலின் தலைமையில் இன்று ஆய்வுக் கூட்டம் நடைபெற்றது. இதையடுத்து பேசிய முதலமைச்சர் ஸ்டாலின், “தமிழ்நாட்டில் இதுவரை கொரோனா தொற்றின் தாக்கம் குறைவாகவே காணப்பட்டாலும், இதனை மேலும் உயராமல் கட்டுப்படுத்த வேண்டும்.
கொரோனா சிகிச்சை வசதிகளை தயார் நிலையில் வைக்கவேண்டும். கொரோனா கட்டுப்பாட்டுப் பணிகளை அனைத்து துறைகளும் ஒருங்கிணைந்து மேற்கொள்ள வேண்டும். பணி இடங்கள், திருவிழாக்கள், திருமணங்கள், கூட்டங்கள், நிகழ்ச்சிகள் போன்ற நிகழ்வுகளில் கலந்து கொள்ளும் மக்களிடையே யாருக்காவது தொற்று ஏற்பட்டால், அனைவரையும் பரிசோதனை செய்து, உரிய சிகிச்சை அளிக்க வேண்டும்.
கொரோனா பாதுகாப்பு நடைமுறைகளான முகக் கவசம் அணிதல், கைகளை அடிக்கடி சுத்தம் செய்தல், சமூக இடைவெளியை கடைப்பிடித்தல் உள்ளிட்டவையை கண்டிப்பாக கடைப்பிடிப்பதை அலுவலர்கள் உறுதி செய்ய வேண்டும். அனைவரும் தடுப்பூசி போட்டுக் கொள்ளும் நிலையை உருவாக்கிட வேண்டும்” என அறிவுரை வழங்கினார்.