வருகிற சட்டமன்ற தேர்தலில் திமுகவிற்கு முக்குலத்தோர் புலிப்படை கட்சி ஆதரவு தரும் என்று கருணாஸ் தெரிவித்துள்ளார்.
நடிகர் கருணாஸ் முக்குலத்தோர் புலிப்படை கட்சி என்ற புதிய கட்சியைத் தொடங்கினார். கடந்த தேர்தலில் அதிமுக கூட்டணியில் போட்டியிட்டு திருவாடானை தொகுதியில் வெற்றி பெற்றார். வரும் சட்டசபை தேர்தலில் தங்கள் கட்சி இரண்டு தொகுதிகளை ஒதுக்க வேண்டும் என்று தெரிவித்து வந்தார். இந்நிலையில் அதிமுக கூட்டிலிருந்து முக்குலத்தோர் புலிப்படை கட்சி விலகுவதாக அறிவித்தார். அப்போது திமுக கூட்டணியில் அவர் இணைவாரா என்ற தகவல் வெளியாகவில்லை. ஆனால் தற்போது திமுகவிற்கு ஆதரவு அளிப்பதாக உறுதி அளித்துள்ளார்.
இந்நிலையில் கருணாஸின் முக்குலத்தோரின் புலிப்படை கட்சியினர் சார்பில் இளைஞரணி செயலாளர் அஜய் வாண்டையார் திமுக அமைப்புச் செயலாளர் ஆர்.எஸ்.பாரதியிடம் தங்களது ஆதரவு கடிதத்தை கொடுத்து வரும் சட்டமன்ற தேர்தலில் திமுகவை முக்குலத்தோர் புலிப்படை கட்சி ஆதரிக்கும் என்று தெரிவித்துள்ளார்.