நேற்று முன்தினம் இந்தியா-வெஸ்ட் இண்டீஸ் இடையிலான மூன்று போட்டிகள் கொண்ட ஒருநாள் தொடரில் இந்தியா அபார வெற்றி பெற்றது. ஆனால் இந்திய அணியில் ருதுராஜ் கெய்க்வாட், ஷிகர் தவன், ஷ்ரேயஸ் ஐயர் ஆகியோருக்கு தொற்று உறுதி செய்யப்பட்டுள்ளதால் ரோஹித் சர்மா இளம் வீரர்களுக்கு வாய்ப்பு கொடுக்க வேண்டிய கட்டாயத்தில் இருந்தார். அப்போது தான் அவர் திறமையின் அடிப்படையில் தீபக் ஹூடாவை அணிக்குள் கொண்டு வந்தார்.
இந்த நிலையில் மும்பை இந்தியன்ஸ் ரசிகர்கள் ஹூடா, க்ருனால் பாண்டியா பெயர்களை ட்ரெண்டிங் செய்ய தொடங்கியுள்ளனர். அதாவது 2021-ஆம் ஆண்டில் இந்த இருவரும் பரோடா அணிக்காக விளையாடிய போது தீபக் ஹூடா கடிதம் ஒன்றை வெளியிட்டிருந்தார். அதில் தனக்கு கேப்டன் க்ருனால் பாண்டியா அதிகம் அழுத்தம் தருவதாகவும், அனைத்து வீரர்கள் முன்பும் தன்னை அவர் அவமானப்படுத்துகிறார் என்றும் எழுதியிருந்தார்.
இதையடுத்து பரோடா கிரிக்கெட் வாரியம் க்ருனால் பாண்டியாவை நீக்காமல் குற்றம் தீபக் ஹூடா மீதுதான் உள்ளது என்று கூறி அவரை இடைநீக்கம் செய்தது. பின்னர் பரோடா அணியிலிருந்து தீபக் ஹூடா விலகினார். ஆனால் தற்போது பாண்டியா சகோதரர்களும், ரோஹித் சர்மாவும் நெருங்கிய நண்பர்களாக இருந்தாலும் கூட பாரபட்சம் பார்க்காமல் தீபக் ஹூடாவுக்கு அவர் விளையாடுவதற்கு முன்னுரிமை வழங்கியுள்ளார். இதனை ரசிகர்கள் அனைவரும் அவருடைய நேர்மையை பாராட்டி வருகின்றனர்.