சென்னை பல்லவன் சாலை சிவசக்தி மாரியம்மன் கோயிலில் ஆடித் திருவிழா நடந்தது. அப்போது நேற்று முன்தினம் இரவு 11 மணி அளவில் பக்தர்களுக்கு அன்னதானம் வழங்கப்பட்டது. இந்நிலையில் அங்குவந்த ஆறுமுகம் (27) என்பவர் வழக்கமாக இரவு 12 மணிக்குதான் அன்னதானம் வழங்கப்படும். இந்த வருடம் ஏன் இவ்வளவு சீக்கிரம் வழங்குகிறீர்கள்..? என்று கூறி வாக்குவாதத்தில் ஈடுபட்டார். இதனால் அவருக்கு ஆதரவாக அஜித், ராஜ்குமார், பிரகாஷ் ஆகிய 3 பேர் குரல் கொடுத்தனர்.
இவர்கள் அனைவரையும் குமார்(36) என்பவர் கண்டித்தார். இதில் குமாருக்கு ஆதரவாக மாரி,செல்வம், மாயவன், முனியன், சதீஷ் போன்ற 5 பேர் வந்தனர். இந்த சூழ்நிலையில் வாக்குவாதம் முற்றி கைகலப்பாக மாறியது. இருதரப்பினரும் கையாலும், கற்களாலும் சரமாரியாக தாக்கிக்கொண்டனர். அப்போது ஆறுமுகம், குமாருக்கு தலையில் ரத்த காயம் ஏற்பட்டது. அத்துடன் அஜித் கண்ணில் காயம் ஏற்பட்டது. இந்த மோதல் சம்பவம் குறித்து 10 பேரை காவல்துறையினர் கைது செய்தனர்.