பிரிட்டன் பிரதமர் போரிஸ் ஜான்சன் இரண்டு நாள் அரசு முறைப் பயணமாக 21மற்றும் 22ம் தேதி இந்தியா வர இருக்கிறார்.
கடந்த 2020 ஆம் ஆண்டில் இரு முறை பிரிட்டன் பிரதமர் போரிஸ் ஜான்சன் இந்தியா வர திட்டமிட்டுள்ளார். ஆனால் அந்த இரு முறையும் கொரோனா காரணமாக அவரது பயணம் ரத்து செய்யப்பட்டிருந்தது. அதேபோல் இந்த ஆண்டு குடியரசு தின விழாவில் சிறப்பு விருந்தினராக பங்கேற்க போரிஸ் ஜான்சன் திட்டமிட்டுள்ளார். ஆனால் பிரிட்டன் நாட்டில் பரவிய கொரோனா தொற்று காரணமாக அவரது பயணம் இந்த முறையும் ரத்து செய்யப்பட்டது.
இந்த நிலையில் இரண்டு நாட்கள் அரசு முறை பயணமாக வரும் 21ஆம் தேதி பிரிட்டன் பிரதமர் போரிஸ் ஜான்சன் இந்தியா வர இருக்கிறார். பயணத்தின் முதல் நாளில் அவர் இந்திய பிரதமர் நரேந்திர மோடியின் சொந்த மாநிலமான குஜராத் மாநிலத்திற்கு செல்ல இருக்கிறார். மேலும் அங்கு பல்வேறு நிகழ்ச்சிகளில் அவர் கலந்து கொள்ள இருக்கிறார்.
பயணத்தின் இரண்டாவது நாளான 22ஆம் தேதி தலைநகர் டெல்லியில் இந்திய பிரதமர் மோடியை, பிரிட்டன் பிரதமர் போரிஸ் ஜான்சன் சந்தித்து பேச்சுவார்த்தை நடத்த இருக்கிறார். அப்போது இரண்டு நாட்களுக்கு இடையேயான நல்லுறவை மேம்படுத்துவது, வர்த்தகம், பாதுகாப்பு போன்ற விவகாரங்கள் குறித்து விவாதிக்கப்படும் என தகவல்கள் வெளியாகி இருக்கின்றன.