சாடிவயல் பகுதியில் அரசுப் பேருந்தை குட்டியானை வழிமறித்து விரட்டியதால் பயணிகள் அச்சமடைந்தனர்.
கோவை மாவட்டத்தில் உள்ள சிறுவாணி ரோடு அருகில் சாடிவயல் பகுதியில் ஐந்து மலை கிராமங்கள் அமைந்துள்ளன. இந்த மலைக் கிராமங்களுக்கு அடிக்கடி பேருந்துகள் கிடையாது. குறிப்பிட்ட சில மணி நேரம் மட்டும் அரசு பேருந்துகள் இயக்கப்படும். இந்நிலையில் சாடிவயல் பகுதியில் இருந்து வெள்ளபதி நோக்கி அரசு பேருந்து சென்று கொண்டிருந்தது.
அப்போது எதிர்பாராதவிதமாக வனப்பகுதியில் இருந்து ரோட்டுக்கு குட்டியானை ஒன்று வந்துள்ளது. அந்தக் குட்டியானை அரசு பேருந்தை வழிமறித்து விரட்டியதால் அதிர்ச்சி அடைந்த ஓட்டுனர் பேருந்தை பின்னோக்கி ஓட்டினார். இதனால் பயணிகள் பயந்து நடுங்கினர். பின் குட்டி யானை வனப் பகுதிக்கு சென்றது. இதையடுத்து பயணிகள் பெருமூச்சுவிட்டு பயத்திலிருந்து வெளிவந்தனர். இதனால்அங்கு சற்று நேரம் பரபரப்பு நிலவியது.
இந்த காட்சியை பேருந்தில் இருந்த ஒருவர் தனது செல்போனில் வீடியோவாக எடுத்து சமூக வலைத்தளங்களில் போட்டுள்ளார். இந்த காட்சி வைரலாகப் பரவி வருகிறது.பொதுவாக இரவு நேரங்களில் சாலையை கடக்கும் யானைகள் கோடைகாலம் என்பதால் பகலிலும் வரத்தொடங்கியுள்ளது.