வியாபாரி குத்தி கொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது.
திருநெல்வேலி மாவட்டத்திலுள்ள நவ்வலடி மேலத்தெருவில் பழைய இரும்பு வியாபாரியான முத்துகிருஷ்ணன்(45) என்பவர் வசித்து வந்துள்ளார். இவரும் அதே பகுதியில் வசிக்கும் செல்வகுமார்(46) என்பவரும் உறவினர்கள் ஆவர். இதில் செல்வகுமார் மனைவியை விட்டு பிரிந்து தனியாக வாழ்ந்து வருகிறார். நேற்று முன்தினம் இரவு நேரத்தில் அப்பகுதியில் உள்ள பேருந்து நிறுத்தம் அருகே இருக்கும் ஹோட்டல் முன்பு செல்வகுமாரும், முத்துகிருஷ்ணனும் பேசிக் கொண்டிருந்தனர். அப்போது முத்துகிருஷ்ணன் மனைவியுடன் சேர்ந்து வாழுமாறு செல்வகுமாருக்கு அறிவுரை கூறியுள்ளார். இதனால் இருவருக்கும் இடையே தகராறு ஏற்பட்டது.
இதில் கோபமடைந்த செல்வகுமார் கத்தியால் முத்துகிருஷ்ணனின் கழுத்தில் சரமாரியாக குத்தியுள்ளார். இதனால் படுகாயமடைந்த முத்துகிருஷ்ணன் சம்பவ இடத்திலேயே பரிதாபமாக உயிரிழந்தார். இதனை பார்த்து அதிர்ச்சியடைந்த பொதுமக்கள் உடனடியாக காவல் துறையினருக்கு தகவல் தெரிவித்தனர். அதன்படி சம்பவ இடத்திற்கு விரைந்து சென்ற காவல்துறையினர் முத்துகிருஷ்ணனின் உடலை மீட்டு பாளையங்கோட்டை ஐகிரவுண்டு அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். இந்த சம்பவம் குறித்து வழக்குப்பதிவு செய்த காவல்துறையினர் செல்வகுமாரை கைது செய்தனர்.