குளத்தில் அழுகிய நிலையில் வாலிபரின் சடலம் மிதந்த சம்பவம் பரபரப்பை ஏற்படுத்தியுள்ளது.
திண்டுக்கல் மாவட்டத்திலுள்ள பழனி-கோதைமங்கலம் சாலையோரத்தில் சிறு நாயக்கன்குளம் உள்ளது. இந்தக் குளத்தில் 35 வயதுடைய வாலிபர் ஒருவர் பிணமாக மிதப்பதை கண்டு அப்பகுதி விவசாயிகள் அதிர்ச்சி அடைந்தனர். இதுகுறித்து விவசாயிகள் பழனி காவல்நிலையத்திற்கு தகவல் அளித்துள்ளனர். அந்த தகவலின் பேரில் காவல்துறையினர் சம்பவ இடத்திற்கு விரைந்து சென்றுள்ளனர். அதன்பின் பழனி தீயணைப்பு படையினர் அந்த இடத்திற்கு வரவழைக்கப்பட்டு குளத்தில் மிதந்த வாலிபரின் சடலத்தை கைப்பற்றினர்.
இதனையடுத்து காவல்துறையினர் அந்த வாலிபரின் சடலத்தை மீட்டு பழனி அரசு மருத்துவமனைக்கு பிரேத பரிசோதனைக்காக அனுப்பி வைத்தனர். ஆனால் அந்த வாலிபரின் உடல் அழுகியிருந்ததால் அவரை அடையாளம் காண முடியவில்லை. இந்த சம்பவம் குறித்து காவல்துறையினர் வழக்குப்பதிவு செய்து அந்த வாலிபரின் இறப்பிற்கு காரணம் என்னவாக இருக்கும் என்று விசாரணை மேற்கொண்டு வருகின்றனர்.