தமிழகத்தில் உள்ளாட்சி தேர்தல் வாக்காளர் பட்டியல் ஆகஸ்ட் 31-ஆம் தேதி வெளியிடப்படும் என மாநில தேர்தல் ஆணையம் தெரிவித்துள்ளது. இதுகுறித்து வெளியிடப்பட்டுள்ள செய்தியில், காஞ்சிபுரம், செங்கல்பட்டு, விழுப்புரம், கள்ளக்குறிச்சி, வேலூர், ராணிப்பேட்டை, திருப்பத்தூர், நெல்லை, தென்காசி ஆகிய 9 மாவட்டங்களில் ஊரக உள்ளாட்சி தேர்தலுக்காக மறுசீரமைக்கப்பட்ட வார்டு வாரியான வாக்காளர் பட்டியலைத் தயாரிக்கும் பணியில் தேர்தல் ஆணையம் ஈடுபட்டுவருகிறது.
கடந்த மார்ச் 19 ஆம் தேதி வெளியிடப்பட்ட சட்டமன்ற தேர்தலுக்கான வாக்காளர் பட்டியல் அடிப்படையிலேயே உள்ளாட்சி தேர்தலுக்கான வாக்காளர் பட்டியல் தயாரிக்கப்படுகிறது. இந்த வாக்காளர் பட்டியல் அடிப்படையில் உள்ளாட்சி தேர்தலுக்கான வாக்காளர் பட்டியலை 31-ந் தேதிக்குள் வெளியிட வாக்குச்சாவடி அலுவலர்களுக்கு அறிவுறுத்தப்பட்டுள்ளது என கூறியுள்ளது.