கடலூர் மாவட்டம் விருத்தாசலம் நகராட்சிக்குட்பட்ட பகுதி நீர்நிலைகளிலுள்ள கட்டிடங்கள் மற்றும் வீடுகளை அகற்ற சென்னை ஐகோர்ட்டு உத்தரவு பிறப்பித்துள்ளது. அந்த வகையில் கடலூர் ரோடு இந்திராநகரில் 4½ ஏக்கர் பரப்பளவில் அமைந்துள்ள முல்லா ஏரியை ஆக்கிரமித்து கட்டப்பட்டுள்ள 66 கடைகள், வீடுகள் மற்றும் ஆலடி ரோட்டில் நீர்நிலைகளை ஆக்கிரமித்து கட்டப்பட்டுள்ள 95 கடைகள், வீடுகளை அகற்றுவதற்காக விருத்தாசலம் வருவாய்த்துறையினர் அளவீடு செய்தனர். இவற்றில் சென்ற சில நாட்களுக்கு முன் 2 வீடுகளின் சுற்றுச் சுவர், ஒரு வீடு மற்றும் ஆலடி சாலையிலுள்ள பாழடைந்த தகர கொட்டகை வீடு, ஒரு காலி மனையில் இருந்த சுற்றுச் சுவர் இடித்து அகற்றப்பட்டது.
அதன்பின் ஆக்கிரமிப்பு அகற்றும் பணியை வருவாய்த் துறையினர் துவங்கினர். இந்நிலையில் மார்க்சிஸ்ட் கம்யூனிஸ்டு கட்சி வட்ட செயலாளர் அசோகன் தலைமையில் பொதுமக்கள் பேரணியாக சென்று சப்-கலெக்டர் அலுவலகத்தில் மனுகொடுக்கும் போராட்டத்தில் ஈடுபட்டனர். இதன் காரணமாக ஆக்கிரமிப்பு அகற்றும் பணியானது நிறுத்தப்பட்டது. இந்த சூழ்நிலையில் மீண்டும் ஆக்கிரமிப்பு அகற்றும் பணி விருத்தாசலம் தாசில்தார் தனபதி முன்னிலையில் துவங்கியது. இதனையொட்டி விருத்தாசலம் உதவி போலீஸ் சூப்பிரண்டு அங்கித் ஜெயின் தலைமையிலான காவல்துறையினர் அங்கு பாதுகாப்பு பணியில் ஈடுபட்டிருந்தனர்.
அதனை தொடர்ந்து பொக்லைன் எந்திரம் வாயிலாக கடைகள் மற்றும் வீடுகளின் முன் பகுதிகள் இடித்து அப்புறப்படுத்தப்பட்டது. இதற்கிடையில் கடையின் உரிமையாளர்கள் சிலர் தாங்களாகவே முன்வந்து, கடை முன் இருந்த ஆக்கிரமிப்புகளை அகற்றினர். பின் கடலூர் சாலையிலிருந்து இந்திரா நகர் உள்ளே சென்று ஆக்கிரமிப்புகளை அகற்றும் பணியானது துவங்கியது. இதற்கு எதிர்ப்பு தெரிவித்து அந்த பகுதி மக்கள் திரண்டு வந்து பொக்லைன் எந்திரத்தை சிறைபிடித்து போராட்டத்தில் ஈடுபட்டதுடன், சாலை மறியலும் செய்தனர். அதன்பின் இந்திரா நகர் பகுதியில் ஆக்கிரமிப்பு அகற்றும் பணியானது கைவிடப்பட்டது.
பிறகு பொதுமக்கள் மறியலை கைவிட்டு அங்கிருந்து கலைந்து சென்றனர். இதன் தொடர்ச்சியாக மீண்டும் கடலூர் சாலையில் மற்றொரு பகுதியில் பொக்லைன் எந்திரம் வாயிலாக கடைகளின் முன்புறம் மட்டும் அப்புறப்படுத்தப்பட்டது. ஆக்கிரமிப்புகளை அகற்றப்போவதாக அதிகாரிகள் தொடர்ந்து வலியுறுத்தியும், நோட்டீஸ் விநியோகித்தும் கடைகளில் இருந்த பொருட்களை அதன் உரிமையாளர்கள் எடுக்கவில்லை என்பது குறிப்பிடத்தக்கது. இதன் காரணமாக கடைகளின் முன்புறம் மட்டும் அப்புறப்படுத்தப்பட்டது. அதனை தொடர்ந்து பொக்லைன் எந்திரம் வாயிலாக கட்டிடங்கள் அனைத்தும் இடித்து அகற்றப்படும் என தாசில்தார் தனபதி தெரிவித்தார்.