இந்தியாவில் கொரோனா இரண்டாவது அலை வேகம் எடுத்து வருகிறது. இதனால் உயிரிழப்புகள் தொடர்ந்து அதிகரித்துக்கொண்டே வருகின்றன. நாளுக்கு நாள் கொரோனாவின் எண்ணிக்கையும் அதிகரித்துக் கொண்டே வருகிறது. இதனால் மருத்துவமனைகளில் கொரோன நோயாளிகள் நிரம்பி வழிவதால் படுக்கை வசதிகள் இல்லாத நிலை ஏற்பட்டு வருகிறது. எனவே பள்ளிகள், கல்லூரிகள், தனியார் மருத்துவமனைகள், தொழில் நிறுவனங்களில் படுக்கை வசதிகள் ஏற்படுத்த சுகாதாரத் துறை உத்தரவிட்டுள்ளது.
இந்தியாவில் சுனாமி போன்று இரண்டாவது அலை தாக்கத்தை ஏற்படுத்தி கொண்டிருக்கிறது. இது குறித்த உண்மை நிலவரம் உறைய வைக்கிறது. தலைநகர் டெல்லியிலேயே ஆக்சிஜன் இருப்பு இல்லை என்று மருத்துவர்கள் தெரிவித்துள்ளனர். இதனால் பெரும் அதிர்ச்சி ஏற்பட்டுள்ளது. மேலும் ஆக்சிஜன் பற்றாக்குறையால் நோயாளிகள் உயிரிழக்கும் அபாயம் ஏற்பட்டுள்ளது. வடமாநிலங்களில் குவியல் குவியலாக சடலங்கள் எரிக்கப்படுகின்றன. இறந்தவர்களை எரியூட்ட நீண்ட வரிசையில் காத்திருக்கும் பரிதாபம் ஏற்பட்டுள்ளது.
இந்நிலையில் டெல்லியில் உள்ள தனியார் மருத்துவமனையான சர் கங்கா ராம் மருத்துவமனையில் ஆக்சிஜன் தட்டுப்பாட்டால் கடந்த 24 மணி நேரத்தில் மட்டும் 25 நோயாளிகள் உயிரிழந்துள்ளனர். இதையடுத்து இரண்டு மணி நேரத்திற்கு மட்டுமே ஆக்சிஜன் இருப்பதால் 60 நோயாளிகள் மரணத்தின் விளிம்பில் உள்ளதாகவும், உடனடியாக தங்களுடைய மருத்துமனைக்கு ஆக்சிஜன் வசதி ஏற்படுத்தி தருமாறு மருத்துவமனை நிர்வாகம் வேண்டுகோள் விடுத்துள்ளது.