ஆசிரியர் தகுதி தேர்வை கூடிய விரைவில் நடத்த ஆசிரியர் தேர்வு வாரியம் திட்டமிட்டுள்ளதாக தகவல் கிடைத்துள்ளது.
தமிழகத்தில் கடந்த 2 ஆண்டுகளாக ஆசிரியர் தகுதித் தேர்வு நடத்தப்படவில்லை. கொரோனா தொற்று பாதிப்பு குறைந்ததை தொடர்ந்து இந்த ஆண்டு ஆசிரியர் தகுதி தேர்வு நடத்தப்படும் என ஆசிரியர் தேர்வு வாரியம் அறிவித்துள்ளது. அதன்படி தேர்வுக்கான அறிக்கை கடந்த மார்ச் 7ஆம் தேதி வெளியிடப்பட்டு விண்ணப்பங்கள் ஆன்லைன் மூலம் பெறப்பட்டு வருகின்றது. இந்த தேர்வுக்கு மொத்தம் 6 லட்சத்து 33 ஆயிரம் பேர் விண்ணப்பித்துள்ளனர். அறிக்கையில் தேர்வு எப்போது நடத்தப்படும்? எந்த முறையில் நடத்தப்படும்? என்பது பற்றி எதுவும் தெரிவிக்கவில்லை.
அதேபோல் தேர்வு குறித்த அறிவிப்பை ஆசிரியர் தேர்வு வாரியம் இதுவரை வெளியிடவில்லை. இதனால் தேர்வு எப்போது நடைபெறும் என்று குழப்பத்துடன் தேர்வுக்கு விண்ணப்பித்தவர்கள் உள்ளனர். இந்நிலையில் ஆசிரியர் தகுதித் தேர்வு ஜூலை இறுதி வாரத்தில் அல்லது ஆகஸ்ட் முதல் வாரத்தில் நடத்த ஆசிரியர் தேர்வு வாரியம் திட்டமிட்டுள்ளதாக தகவல் வெளியாகியுள்ளது. தேர்வில் தேர்ச்சி பெற்றவர்களுக்கு அடுத்த கட்டமாக இடைநிலை ஆசிரியர் மற்றும் பட்டதாரி ஆசிரியர் பணி நியமனத்திற்கான போட்டி தேர்வு நடைபெறும் என்று தெரிவிக்கப்பட்டுள்ளது. ஒன்று முதல் எட்டாம் வகுப்பு வரை பணியாற்றும் இடைநிலை ஆசிரியர்கள் மற்றும் பட்டதாரி ஆசிரியர்களுக்கு தகுதி தேர்வு கட்டாயம் என்பது குறிப்பிடத்தக்கது.