மசினகுடி ஏரி அருகே யானை தாக்கி மூதாட்டி உயிரிழந்த சம்பவம் பெரும் சோகத்தை ஏற்படுத்தியுள்ளது.
நீலகிரி மாவட்டம், மசினகுடி பகுதியில் வசித்துவந்த கண்ணையன் என்பவரின் மனைவி சிவ நஞ்சம்மாள்(65). இவர் ஆடு மேய்க்கும் தொழில் செய்து வருகின்றார். மசினகுடி வன அலுவலகத்தின் பின்பக்கம் ஏரி, ஊராட்சி மற்றும் மீன்வளத்துறை கிளை அலுவலகங்கள் உள்ளது. இதனால் அந்தப் பகுதியில் மக்கள் நடமாட்டம் அதிகமாக காணப்படுகிறது. இந்நிலையில் அந்த பகுதியில் சிவ நஞ்சம்மாள் ஆடு மேய்த்துக் கொண்டிருந்தார். அப்போது அங்கு தீடீரென காட்டு யானை புகுந்தது. இதை பார்த்து அதிர்ச்சி அடைந்த சிவ நஞ்சம்மாள் தப்பி ஓட முயன்றுள்ளார்.
ஆனால் அதற்குள் காட்டு யானை அவரை தாக்க சம்பவ இடத்திலேயே பரிதாபமாக உயிரிழந்தார். இந்த சத்தத்தை கேட்டு சிங்கார வனத்துறையினர் மற்றும் அப்பகுதியில் உள்ள கிராம மக்கள் ஓடிவந்து பார்த்த போது சிவ நஞ்சம்மாள் இறந்து கிடப்பதையும் அருகில் காட்டுயானை நிற்பதையும் பார்த்து அதிர்ச்சி அடைந்துள்ளனர். பின் அந்த காட்டு யானையை வனப்பகுதிக்கு துரத்தி விட்டு சிவ நஞ்சம்மாள் உடலை மீட்டு பிரேத பரிசோதனைக்காக கூடலூர் அரசு மருத்துவமனைக்கு கொண்டு சென்றனர். மேலும் இதுகுறித்து வனத்துறையினர் விசாரணை மேற்கொண்டு வந்துள்ளனர்.