ஆட்டோவை திருடிய குற்றத்திற்காக காவல்துறையினர் 2 நபர்களை கைது செய்துள்ளனர்.
மயிலாடுதுறை மாவட்டத்திலுள்ள அருணகிரிநாதர் தெருவில் ஆட்டோ ஓட்டுநரான முத்தலிப் என்பவர் வசித்து வருகிறார். இவர் கடந்த 14-ஆம் தேதி தனது வீட்டின் அருகே ஆட்டோவை நிறுத்திவிட்டு சென்றுள்ளார். அதன்பின் மறுநாள் காலையில் நிறுத்தி வைக்கப்பட்ட இடத்தில் ஆட்டோ இல்லாததை கண்டு முத்தலிப் அதிர்ச்சியடைந்தார். இதுகுறித்து முத்தலிப் காவல்நிலையத்தில் புகார் அளித்துள்ளார். அதன்படி தனிப்படை காவல்துறையினர் திருட்டு போன பகுதியிலுள்ள சி.சி.டி.வி. கேமராவை ஆய்வு செய்துள்ளனர்.
அதில் அடையாளம் தெரியாத 2 மர்ம நபர்கள் ஆட்டோவைத் திருடிச் சென்றது தெரியவந்தது. இதுகுறித்து காவல்துறையினர் நடத்திய விசாரணையில் திருட்டில் ஈடுபட்டவர்கள் ஷேக் அலாவுதீன் மற்றும் முகமது சித்திக் என்பது தெரியவந்துள்ளது. மேலும் அவர்கள் ஆட்டோவை திருச்சியிலுள்ள ஒரு நபரிடம் விற்பனை செய்ததும் அந்த விசாரணையில் தெரியவந்துள்ளது. இதுகுறித்து வழக்கு பதிந்த காவல்துறையினர் ஷேக் அலாவுதீன் மற்றும் முகமது சித்திக் ஆகியோரை கைது செய்து சிறையில் அடைத்தனர்.