சென்னை அண்ணா நகரிலுள்ள ஒரு ஏ.டி.எம். மையத்தில் பணம் செலுத்தும் எந்திரத்தில் பணம் போடுவதற்காக பாடியை சேர்ந்த தனுஷ் (21) என்பவர் வந்தார். அப்போது அவருக்கு எந்திரத்தில் எவ்வாறு பணம் செலுத்துவது என்பது தெரியாமல் தவித்தார். இதனால் அங்குவந்த மர்மநபர் எந்திரத்தில் பணம் செலுத்த உதவி செய்வதாக தனுசிடம் கூறினார். இதையடுத்து பணம் செலுத்துவது போன்று நடித்த மர்ம நபர், எந்திரத்தில் பணம் செலுத்த முடியாததால் தன் செல்போனிலிருந்து ஆன்லைன் வாயிலாக உங்கள் வங்கி கணக்கிற்கு பணத்தை அனுப்பி வைக்கிறேன் என்று கூறினார்.
அதனை உண்மை என நம்பிய தனுஷ் ரூபாய்.36 ஆயிரத்தை அவரிடம் கொடுத்துவிட்டு சென்றுவிட்டார். எனினும் நீண்ட நேரம் ஆகியும் அவரது வங்கி கணக்கிற்கு பணம் வந்துசேராததால் அந்த நபரை தொடர்பு கொண்டபோது செல்போன் சுவிட்ச் ஆப் செய்யப்பட்டிருந்தது. அதன்பிறகுதான் மர்மநபர் தன்னிடம் நூதன முறையில் பணத்தை அபேஸ் செய்தது தனுசுக்கு தெரியவந்ததால் அதிர்ச்சியடைந்தார். இது தொடர்பாக அண்ணா நகர் காவல்துறையினர் விசாரணை மேற்கொண்டு வருகின்றனர்.