ராஜமவுலி இயக்கத்தில் ஜுனியர் என்டிஆர், ராம்சரண், ஆலியாபட் மற்றும் பல பேர் நடித்து இந்த ஆண்டில் வெளிவந்து 1000 கோடிக்கும் மேல் வசூலித்த தெலுங்குத் திரைப்படம் “ஆர்ஆர்ஆர்”. இந்தியா சார்பாக ஆஸ்கர் விருதுக்காகத் தேர்வு செய்யப்படாத நிலையில், நேரடியாக அப்போட்டியில் இந்த படம் பங்கேற்கிறது. இதற்கென ராஜமவுலி அமெரிக்கா சென்று இருக்கிறார். அங்கு ஆர்ஆர்ஆர் திரைப்படத்தின் சில சிறப்புக் காட்சிகள் சென்ற சில வாரங்களாக நடந்து வந்தது. இந்த படம் குறித்து ஆஸ்கர் குழுவுக்கும், அமெரிக்க ரசிகர்களுக்கும் தெரிவிப்பதற்காக பல விதமான பிரமோஷன் நிகழ்வுகளும் அங்கு நடந்து வருகிறது.
இதற்காக ரூபாய்.50 கோடிக்கும் அதிகமாக படக்குழு செலவு செய்வதாக டோலிவுட் வட்டாரங்களில் முன்பே பேசப்பட்டு வருகிறது. இதற்கிடையில் இந்த செலவுகள் அனைத்தையும் ராஜமவுலியே ஏற்றுக்கொள்வதாக தெரிவித்து இருப்பதாகவும் கூறுகிறார்கள். பாகுபலி 1,2, ஆர்ஆர்ஆர் போன்ற படங்கள் வாயிலாக ராஜமவுலி 300 கோடிக்கும் அதிகமாக சம்பளம் பெற்றுள்ளதாக ஒரு தகவல் இருக்கிறது. ஆர்ஆர்ஆர் திரைப்படத்திற்காக ஒருசில ஆஸ்கர் விருதுகள் வென்றால் கூட சர்வதேச அளவில் அவரது மார்க்கெட்டும் பிரபலமும் உயர்ந்துவிடும். இதனால் தான் பல்வேறு விஷயங்களை ராஜமவுலி அமெரிக்காவில் தங்கி செய்து வருகிறாராம்.