ஆளுநரின் கருத்து குறித்து பேசி நேரத்தை வீணடிக்க விரும்பவில்லை என்று அமைச்சர் மா. சுப்பிரமணியன் தெரிவித்துள்ளார்.
சபரிமலை ஐயப்ப சேவா சமாஜம் நடத்திய ஹரிவராசனம் நூற்றாண்டு சென்னை வானகரத்தில் உள்ள தனியார் மண்டபத்தில் நடைபெற்றது. இதில் தமிழக ஆளுநர் ரவி கலந்து கொண்டு உரையாற்றினார். அப்போது பேசிய அவர் வேற்றுமையில் ஒற்றுமை என்ற நாட்டை பற்றி கூறுகிறோம். இந்தியாவில் ராணுவம், பொருளாதாரம், வளர்ச்சி அடைவதை போல ஆன்மிகத்திலும் வளர்ச்சி அவசியம். ஆன்மிகத்தில் வளர்ச்சி இந்தியாவின் வளர்ச்சியாக அமையும் என்று கூறினார். இந்தியாவின் தலைமைத்துவம் ஆன்மீகத்தின் மீது நம்பிக்கை கொண்டதாக இருக்க வேண்டும் என்று தெரிவித்த அவர் ஆன்மிகத்தில் வளர சனாதன தர்மம் வழிமுறையாக இருக்கும் என்று தெரிவித்திருந்தார்.
இந்நிலையில் மக்கள் நல்வாழ்வுத் துறை அமைச்சர் மா. சுப்பிரமணியன் மதுரையில் செய்தியாளர்களை சந்தித்தபோது ஆளுநர் பேசியது தொடர்பாக கேள்வி எழுப்பப்பட்டது. அதற்கு பதிலளித்த அமைச்சர் மா சுப்பிரமணியன் ஆளுநரின் கருத்து குறித்து பேசி நேரத்தை வீணடிக்க விரும்பவில்லை என்று கூறினார். மேலும் எய்ட்ஸ் மருத்துவமனை டிசைன் இரண்டு மாதத்தில் தயாராகிவிடும். டிசைன் தயாரானதும் டெண்டர் விடப்பட்டு கட்டுமான பணிகள் தொடங்கும் என அமைச்சர் கூறியுள்ளார். தமிழகத்தில் தொற்று பாதிப்பு இரண்டு சதவீதம் அளவில் இருப்பதால் கட்டுப்பாடுகள் விதிக்க வேண்டிய நிலை ஏற்படவில்லை என்று அவர் கூறியுள்ளார்.