இங்கிலாந்தில் பிரதமர் பதவிக்கு போட்டியிடும் இந்திய வம்சாவளியான முன்னாள் நிதி மந்திரி ரிஷி சுனக், வெளியுறவு மந்திரி லீஸ் டிரஸ் ஆகிய இருவரும் பொருளாதாரக் கொள்கைகள், வரி குறைப்பு போன்ற பல்வேறு விவகாரங்களில் வேறுபட்ட கருத்துக்களை கொண்டிருந்தாலும் சீனாவை எதிர்ப்பதில் ஒருமித்த கருத்தை கொண்டுள்ளனர். இங்கிலாந்துக்கு சீனா மிகப்பெரிய அச்சுறுத்தல் என இருவரும் குற்றம் சாட்டி வருகின்றனர். அதுமட்டுமில்லாமல் பிரதமராக தேர்வு செய்யப்பட்டால் சீன உறவில் கண்டிப்பாக இருப்பேன் என்றும் இங்கிலாந்தின் தொழில்நுட்பங்களை சீனா திருடுவதை தடுக்க உரிய நடவடிக்கைகளை மேற்கொள்வேன் என்றும் இருவரும் பிரச்சாரம் செய்து வருகின்றனர்.
இந்நிலையில் சீனாவில் ஒரு அச்சுறுத்தலாக முன்னுறுத்தி பிரச்சாரம் செய்வதை நிறுத்தும்படி இங்கிலாந்து பிரதமர் வேட்பாளர்கள் இருவரையும் சீனா எச்சரித்துள்ளது. இது குறித்து சீனா வெளியுறவு அமைச்சகத்தின் செய்தி தொடர்பாளர் ஜாவோ லீஜியன் கூறியது, சில இங்கிலாந்து அரசியல்வாதிகளுக்கு நான் ஒன்றே தெளிவுபடுத்த விரும்புகிறேன். சொந்த பிரச்சினைகளை தீர்க்க முடியாத நீங்கள் சீனாவை அச்சுறுத்தல் என்று அழைப்பது உள்ளிட்ட சீனாவை பற்றிய பொறுப்பேற்ற கருத்துக்களை வெளியிடுவதை நிறுத்த வேண்டும் என்று அவர் தெரிவித்துள்ளார்.