தமிழகம் அரசு மருத்துவமனைகளில் இதயவியல், நரம்பியல் மற்றும் சிறுநீரகம் உள்ளிட்ட உயர் சிறப்பு மருத்துவ படிப்புகளில் ஏராளமான மாணவர்கள் படித்து வருகிறார்கள். அவர்கள் படிப்பை முடித்த பிறகு இரண்டு ஆண்டுகாலம் அரசு மருத்துவமனையில் பணியாற்ற வேண்டும் என்ற விதி உள்ளது. இந்த நிலையில் தமிழகத்தில் 2020 மற்றும் 2021 ஆம் ஆண்டில் இந்த படிப்புகளை முடித்த மாணவர்களுக்கான பணி கலந்தாய்வு அண்மையில் நடந்தது.
அப்போது பெரும்பாலான மாணவர்கள் அரசு மருத்துவமனைகளில் பணியாற்ற விருப்பம் இல்லை என்று தெரிவித்தனர். அதனால் அரசு மருத்துவமனைகளில் பணியாற்ற விருப்பம் தெரிவிக்காத மாணவர்களை கண்டறிந்து நடவடிக்கை எடுக்க மருத்துவ கல்வி இயக்குனரகம் உத்தரவிட்டுள்ளது. அதுமட்டுமன்றி அவர்களிடம் இருந்து தலா 50 லட்சம் ரூபாய் அபராதம் வசூலிக்க வேண்டும் என்றும் உத்தரவிடப்பட்டுள்ளது.