மும்பையில் செயல்பட்டு வரும் ஆர்.பி.ஜி., என்டர்பிரைசஸ் நிறுவனத்தின் தலைவர் ஹர்ஷ் கோயங்கா, அலுவலகத்தில் தன்னை யாரேனும் சார் என்று கூப்பிட்டால் ரூபாய் 50 அபராதம் விதித்து வருகிறார். இது தொடர்பாக ஹர்ஷ் கோயங்கா கூறியதாவது “சார் என்ற வார்த்தை ஒரு நவீனமான அடிமைத்தன வார்த்தை ஆகும். இதுபோன்ற அடிமைத்தனமான வார்த்தைகளை களைய வேண்டியது அவசியமாகும்.
ஆகவே தான் என்னை பெயர் சொல்லி அழைக்க கூறுகிறேன். இருப்பினும் என்னிடம் பணியாற்றும் ஊழியர் ஒருவர் என்னைப் பெயர் சொல்லி அழைக்க முடியாமல் தினசரி 50 ரூபாயைப் பெட்டியில் போட்டு விடுவார். இது மிகவும் நகைச்சுவையாக இருக்கும். அத்துடன் பலர் பழக்கத் தோஷத்தில் என்னை சார் என்று அழைத்து மாட்டிக் கொள்வார்கள். இந்த அபராத தொகையை சேகரித்து தொண்டு காரியங்களுக்கு பயன்படுத்துகிறேன்” என அவர் தெரிவித்துள்ளார்.