பீகார் மாநிலத்தில் ஆசிரியர் தகுதி தேர்வு மதிப்பெண் பட்டியலில் மலையாள நடிகை அனுபமா பரமேஸ்வரன் புகைப்படம் இருந்தது பெரும் சர்ச்சையை ஏற்படுத்தியுள்ளது.
பீகார் மாநிலத்தில் ஆசிரியர் பணியிடங்களை நிரப்புவதற்கான தகுதி தேர்வு 2019 ஆம் ஆண்டு நடத்தப்பட்டது. இதற்கான முடிவுகள் கடந்த மார்ச் மாதம் வெளியானது. சில தொழில்நுட்ப பிரச்சினைகள் காரணமாக உருது, சமஸ்கிருதம் மற்றும் அறிவியல் ஆகிய மூன்று பாடங்களில் மதிப்பெண்கள் வெளியிடப்படாமல் இருந்து வந்தது. தற்போது இணையத்தில் தொழில்நுட்ப பிரச்சனைகள் சரி செய்யப்பட்டதால், மதிப்பெண் பட்டியல் வெளியானது. அதில் ரிசிகேஷ் குமார் என்ற மாணவரின் மதிப்பெண் பட்டியலில் அவரது புகைப்படத்திற்கு பதிலாக மலையாள நடிகை அனுபமா பரமேஸ்வரன் புகைப்படம் இடம்பெற்றுள்ளது பெரும் சர்ச்சையை ஏற்படுத்தியுள்ளது.
இதை அடுத்து பீகாரில் ஆளும் கட்சியான ஜனதா தளம் கட்சியின் தலைவர் குலாம் கூறுகையில் அதிக எண்ணிக்கையிலான மதிப்பெண் பட்டியலை வெளியிடும் போது இதுபோன்ற சில தவறுகள் நடைபெற்று விடுகின்றது. விரைவில் இதனை சரி செய்து விடுவோம் என அவர் தெரிவித்தார். இது போன்ற சம்பவம் நடப்பது இது முதல் முறை அல்ல. கடந்த 2019 ஆம் ஆண்டு பீகார் பொது சுகாதாரம் பொறியியல் துறையின் தகுதிப் பட்டியலில் இந்தி நடிகை சன்னி லியோனின் புகைப்படம் தவறுதலாகச் இடம்பெற்றது குறிப்பிடத்தக்கது.