இந்தியாவில் தனது சந்தை இருப்பை அதிகரிக்கும் நோக்கில் வரும் பன்டிகை காலத்தில் ஆப்பிள் நிறுவனம் பல அதிரடி ஆப்பர்களை வழங்கும் என்று எதிர்பார்கப்படுகிறது.
உலகிலேயே சீனாவுக்கு அடுத்தப்படியாக அதிக ஸ்மார்ட்போன் பயனாளர்களைக் கொண்ட நாடு இந்தியா. இங்கு சீன நிறுவனங்களின் ஆதிக்கம் அதிகமாக இருப்பதால், ஆப்பிள் நிறுவனத்தால் பெரிய அளவு இந்திய சந்தையை கைப்பற்ற முடியவில்லை.
இருப்பினும், கடந்த சில மாதங்களாகவே தெற்காசிய நாடுகளில் குறிப்பாக இந்தியாவில் தனது சந்தை இருப்பை அதிகரிக்க ஆப்பிள் முயன்றுவருகிறது. மற்ற நாடுகளில் தனது தயாரிப்புகளை ஆப்பிள் நிறுவனம் நேரடியாக வாடிக்கையாளர்களுக்கு விற்பனை செய்யும். ஆனால், இந்தியாவில் மூன்றாம் நிறுவனங்கள் மூலம்தான் ஆன்லைனிலும் ஆப்லைனிலும் தங்கள் தயாரிப்புகளை விற்பனை செய்கிறது.
வெளிநாட்டு நிறுவனம் ஒன்று இந்தியாவில் நேரடியாக தனது தயாரிப்புகளை விற்பனை செய்ய வேண்டும் என்றால், அது தனது தயாரிப்புகளில் குறைந்தது 30 விழுக்காடு இந்தியாவில் உற்பத்தி செய்திருக்க வேண்டும் என்ற விதி இருந்தது. இதன் காரணமாக ஆப்பிள் நிறுவனத்தால் நேரடியாக தனது தயாரிப்புகளை வாடிக்கையாளர்களுக்கு விற்பனை செய்ய முடியவில்லை, ஆனால், சமீபத்தில்தான் மத்திய அமைச்சரவை இந்த விதியை நீக்கியது.
இதன் காரணமாக, ஆப்பிள் நிறுவனத்தால் இனிமேல் தனது தயாரிப்புகளை நேரடியாக வாடிக்கையளர்களுக்கு விற்க முடியும். முதலில் ஆப்பிள் நிறுவனம் நேரடியாக தனது இணையதளம் மூலம் விற்பனையை தொடங்கும் என்று எதிர்பார்க்கப்படுகிறது. இந்த விற்பனையை கடந்த ஏப்ரல் மாதமே தொடங்க ஆப்பிள் திட்டமிட்டிருந்தது, ஆனால் கரோனா பரவல் காரணமாக இது தள்ளிப்போனது.
ஆன்லைன் விற்பனையை தொர்ந்து விரைவிலேயை தனது ஷோரூம்களையும் ஆப்பிள் நிறுவனம் இந்தியாவில் தொடங்க திட்டமிட்டுள்ளது. அதன்படி வரும் 2021ஆம் ஆண்டு பெங்களூரு அல்லது மும்பையில் ஆப்பிள் நிறுவனத்தின் முதல் கடை திறக்கப்படும் என்று எதிர்பார்க்கப்படுகிறது.
இதுதவிர உற்பத்திக்காக சீனாவை சார்ந்திருப்பதை குறைக்க முடிவு செய்துள்ள ஆப்பிள், தனது உற்பத்தியில் குறிப்பிடத்தக்க அளவு இந்தியாவுக்கு மாற்றவும் திட்டமிட்டுள்ளது. ஏற்கனவே, ஆப்பிள் iphone SE 2020, iphone XR, iphone 11 உள்ளிட்ட ஸ்மார்ட்போன்களை இந்தியாவில் அசெம்பிள் செய்ய தொடங்கிவிட்டன.
இந்த ஸ்மார்ட்போன்கள் இந்தியாவில் அசெம்பிள் செய்யப்படுவதால் இறக்குமதி வரி 30 விழுக்காட்டிலிருந்து ஆப்பிள் தப்பிக்கும். இத்துடன், நேரடியாக வாடிக்கையாளர்களுக்கே தனது தயாரிப்புகளை விற்பனை செய்யவுள்ளதால், ஆப்பிள் நிறுவனம் தீபாவளியில் தொடங்கும் பண்டிகை காலத்தில் பல அதிரடி ஆப்பர்களை அளிக்கும் என்று எதிர்பார்க்கபடுகிறது.