“இந்த ஆண்டிற்குள் கொரோனாவை ஒழித்துக்கட்டுவோம்” – அதிபர் டிரம்ப்

அதிபர் டிரம்ப் வெள்ளை மாளிகையில் வைத்து உரையாற்றும் பொழுது கொரோனா விரைவில் ஒழித்துக்கட்டப்படும் என கூறியுள்ளார்.

அதிபர் வேட்பாளர் தேர்வை டிரம்ப் அதிகாரப்பூர்வமாக ஏற்றுக்கொள்ளும் நிகழ்வு, வாஷிங்டனில் உள்ள வெள்ளை மாளிகையில் மிக பிரமாண்டமாக நடைபெற்றது. இந்த மாபெரும் விழாவில் மனைவி மெலனியாவுடன் கலந்து கொண்டு சிறப்பித்த அதிபர் டிரம்ப், குடியரசு கட்சியின் பிரசாரத்தையும் அதிகாரப்பூர்வமாக தொடங்கி வைத்தார். மேலும் அதிபர் வேட்பாளராக கட்சி சார்பில் 2வது முறை அறிவிக்கப்பட்டதை ஏற்றுக்கொண்ட டிரம்ப் உரையாற்றினார். அந்த உரையில், “குறைந்த நேரத்தில் தடுப்பூசி தயாரிப்பதற்காக அமெரிக்காவின் தலைசிறந்த விஞ்ஞானிகளை ஏற்பாடு செய்துள்ளோம்.

இந்த வருட இறுதிக்குள் பாதுகாப்பான மற்றும் பயனுள்ள கொரோனா தடுப்பூசி மக்கள் பயன்பாட்டிற்கு வந்து சேரும். அவற்றை வைத்து நாம் கொரோனாவை ஒழித்துக்கட்டலாம். அமெரிக்காவில் 3 வகையான கொரோனா தடுப்பூசி இறுதி கட்ட சோதனையில் இருக்கிறது. அவை விரைவில் உற்பத்தி செய்யப்பட்டு இந்த வருடத்திற்குள் கிடைக்கும்”, இவ்வாறு அவர் உறுதிபட பேசினார்.  அமெரிக்காவில் 60 லட்சம் பேர் கொரோனாவால் பாதிக்கப்பட்டுள்ள நிலையில், 33 லட்சம் பேர் தொற்றிலிருந்து குணமடைந்து வீடு திரும்பி உள்ளனர். மேலும் இதுவரை 1.85 லட்சம் பேர் உயிரிழந்துள்ளனர் என்பது குறிப்பிடத்தக்கது.