சென்னை, காஞ்சிபுரம் ,செங்கல்பட்டு, திருவள்ளூர் என நான்கு மாவட்டங்களுக்கு உள்ளூர் விடுமுறை அளிக்கப்படுவதாக தமிழக அரசு தெரிவித்துள்ளது.
44வது செஸ் ஒலிம்பியாட் போட்டி செங்கல்பட்டு மாவட்டம் மாமல்லபுரத்தில் வரும் 28ஆம் தேதி தொடங்கி அடுத்த மாதம் பத்தாம் தேதி வரை நடைபெற உள்ளது. இதற்கான ஏற்பாடுகள் அனைத்தும் மும்முறமாக மேற்கொள்ளப்பட்டு வருகின்றது. ஒவ்வொரு மாவட்ட வாரியாகவும் விழிப்புணர்வு ஏற்படுத்தப்பட்டு பணிகள் மேற்கொள்ளப்பட்டு வருகின்றது. மேலும் போட்டி நடைபெறும் மாமல்லபுரத்தில் பாதுகாப்பு பணிகள் தீவிர படுத்தப்படுகின்றது.
விளையாட்டு வீரர்கள் வருகை குறித்த விவரங்கள், விமான நிலையத்தில் மேற்கொள்ளப்பட்டுள்ள முன்னேற்பாடு பணிகள், பாதுகாப்பு ஏற்பாடுகள், தங்குமிட வசதிகள் தொடக்க விழா மற்றும் நிறைவு விழா ஏற்பாடுகள், அழைக்கப்படும் முக்கிய அழைப்பாளர்கள் என அனைத்து ஆய்வு செய்யப்பட்டு வருகின்றது . மேலும் சென்னை, காஞ்சிபுரம், செங்கல்பட்டு மற்றும் திருவள்ளூர் ஆகிய மாவட்டங்களுக்கு 28ஆம் தேதி உள்ளூர் விடுமுறை அறிவிப்பது குறித்தும் ஆலோசனை மேற்கொள்ளப்பட்டது. இதைத்தொடர்ந்து இந்த நான்கு மாவட்டங்களுக்கு ஜூலை 28ஆம் தேதி உள்ளூர் விடுமுறை அளிக்கப்படுவதாக தெரிவிக்கப்பட்டுள்ளது. இதனால் அன்றைய தினம் மாவட்டத்தில் உள்ள பள்ளி, கல்லூரிகள், அரசு அலுவலகங்கள் செயல்படாது என்றும் கூறப்பட்டுள்ளது.