ரயில்களில் இரவு 11 மணி முதல் காலை 5 மணி வரை செல்போன் சார்ஜ் செய்ய தடை விதித்து ரயில்வே நிர்வாகம் உத்தரவிட்டுள்ளது.
இந்தியாவில் கொரோனா அச்சுறுத்தல் காரணமாக கடந்த மார்ச் மாதம் ஊரடங்கு அமல்படுத்தப்பட்டது. அப்போது பலத்த கட்டுப்பாடுகள் விதிக்கப்பட்டன. அதிலும் குறிப்பாக போக்குவரத்து சேவை முற்றிலும் முடங்கியது. அதனால் மக்களின் வாழ்வாதாரம் பாதிக்கப் பட்டதால் ஊரடங்கு தளர்வுகள் அறிவிக்கப்பட்டு வருகின்றன. அதன் முக்கிய பகுதியாக போக்குவரத்து சேவை மீண்டும் தொடங்கியுள்ளது. இருந்தாலும் குறிப்பிட்ட அளவிலான பேருந்துகள், ரயில்கள் மற்றும் விமானங்கள் மட்டுமே இயக்கப்பட்டு வருகின்றன. மக்களின் தேவைக்கு ஏற்றவாறு சிறப்பு ரயில்களும் இயங்கிக் கொண்டிருக்கின்றன.
இந்நிலையில் ரயில்களில் இரவு 11 மணி முதல் அதிகாலை 5 மணி வரை செல்போன் சார்ஜ் செய்ய தடை விதித்து ரயில்வே நிர்வாகம் உத்தரவிட்டுள்ளது. இரவு நேரங்களில் பயணிகள் செல்போனை சார்ஜ் போட்டுவிட்டு தூங்குவதால் அவை சூடாகி தீ விபத்துகள் ஏற்படுவதாக கூறப்படுகிறது. இந்த தீ விபத்துக்களை தடுப்பதற்காக இரவில் சார்ஜ் போட தடை விதித்து உத்தரவிடப்பட்டுள்ளது.