உக்ரைன் மற்றும் ரஷ்யா போரின் விளைவாக கடந்த 4 மாதங்களுக்கு மேலாக உக்ரைன் நாட்டு மக்களின் வாழ்வாதாரம் பெரிதும் பாதிக்கப்பட்டுள்ளது. அது மட்டுமல்லாமல் உலக தானிய சந்தையில் முக்கிய பங்கு வகித்து வருகின்ற உக்ரைனில் தற்போது ரஷ்யா தொடர்ந்து நடத்தி வரும் தாக்குதல் காரணமாக உணவு தானியங்கள் அழிக்கப்பட்டு வருகின்றன. ஏற்கனவே அறுவடை செய்யப்பட்ட கோதுமை மற்றும் மக்காச்சோளம் உள்ளிட்ட தானியங்கள் ஏற்றுமதி செய்ய முடியாத நிலையில் உள்ளது. அதனால் அங்குள்ள உணவு தானியக் கிடங்குகள் அழிக்கப்பட்டு வருகின்றன.
மேலும் தற்போது அறுவடை செய்யப்படும் தானியங்களையும் சேமிக்க இடமில்லாத அவலநிலை ஏற்பட்டிருக்கிறது. விவசாயம் செழிக்கும் கிழக்குப்பகுதியில் ரஷ்யா தாக்குதல் நடத்தி வருவதால் அங்குள்ள தானியக் கிடங்கில் இருப்பு வைக்கப்பட்டிருந்த 3 லட்சம் டன் கோதுமை, மக்காச்சோளம் மற்றும் சூரியகாந்தி விதைகள் முற்றிலும் நாசம் அடைந்து இருக்கலாம் என்று விவசாயிகள் அஞ்சுகின்றனர். மேலும் இரு தரப்பினருக்கு இடையே மாறி மாறி ஏவுகணை தாக்குதல் நடைபெறுவதால் விவசாய நிலங்கள் தீப்பற்றி எரிகின்றன. இந்த நிலை இப்படியே தொடர்ந்தால் உக்ரேனில் விலைவாசி உயர்வு ஏற்படுவது மட்டுமல்லாமல் பட்டினிச் சாவுகளும் அதிகரிக்கும் என்று பொருளாதார நிபுணர்கள் எச்சரிக்கை அறிவிப்பை வெளியிட்டுள்ளனர்.