தமிழகத்தில் கொரோனா பரவல் காரணமாக ஊரடங்கு அமல்படுத்தப்பட்டு கடுமையான கட்டுப்பாடுகள் விதிக்கப்பட்டிருந்தன. இதனால் வெளி மாநிலங்களுக்கு இடையேயான பேருந்து சேவைகள் நிறுத்தி வைக்கப்பட்டிருந்தது. இதற்கிடையில் பாதிப்பு சற்று குறைந்து வருவதால் பல்வேறு தளர்வுகள் அளிக்கப்பட்டு வருகிறது. இந்நிலையில் இன்றுடன் ஊரடங்கு முடிவடைய இருந்த நிலையில் செப்டம்பர் 4ஆம் தேதி வரை ஊரடங்கை தமிழக அரசு நீட்டித்துள்ளது.
இதில் கூடுதலாக சில தளர்வுகள் அளிக்கப்பட்டுள்ளன. அதன்படி ஆந்திரா, கர்நாடகா மாநிலங்களுக்கு பொது போக்குவரத்துக்கு தமிழக அரசு அனுமதி அளித்த நிலையில், கர்நாடகாவில் இருந்து தமிழகத்திற்கு இன்று முதல் மீண்டும் போக்குவரத்து சேவை இயங்கும் என்று கர்நாடக அரசு போக்குவரத்து கழகம் அறிவித்துள்ளது. அதன்படி இன்று முதல் மாநிலத்தின் வெவ்வேறு இடங்களில் இருந்து தமிழகத்திற்கு 250 பேருந்துகள் இயக்கப்படும் எனவும் தெரிவித்துள்ளது.