பால் வேன் மோதிய விபத்தில் ஒருவர் உயிரிழந்த சம்பவம் சோகத்தை ஏற்படுத்தியுள்ளது.
தஞ்சை மாவட்டத்திலுள்ள நாச்சியார்கோவில் பழங்குடி கிராமத்தில் கருணாகரன் என்பவர் வசித்து வந்துள்ளார். இவருக்கு முருகேசன் என்ற அண்ணன் உள்ளார். இவர்கள் 2 பேரும் மயிலாடுதுறையிலுள்ள அவர்களது உறவினர் வீட்டிற்கு இருசக்கர வாகனத்தில் சென்றுவிட்டு ஊருக்கு திரும்பி வந்து கொண்டிருந்தனர். இந்நிலையில் மயிலாடுதுறை மாவட்டத்திலுள்ள திருவிழந்தூர் மேலவீதியில் சென்று கொண்டிருந்த போது எதிரே வந்த பால் வேன் எதிர்பாராதவிதமாக முருகேசன் ஓட்டி வந்த இருசக்கர வாகனத்தின் மீது பலமாக மோதியது. இந்த விபத்தில் கருணாகரன் பால் வேன் சக்கரத்தில் சிக்கி சம்பவ இடத்திலேயே பரிதாபமாக உயிரிழந்துவிட்டார்.
மேலும் பலத்த காயமடைந்த முருகேசனை அக்கம் பக்கத்தினர் மீட்டு அரசு மருத்துவமனைக்கு சிகிச்சைக்காக அனுப்பி வைத்துள்ளனர். இதுகுறித்து தகவலறிந்த காவல்துறையினர் சம்பவ இடத்திற்கு விரைந்து சென்று கருணாகரனின் சடலத்தை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதுகுறித்த புகாரின் பேரில் வழக்குப் பதிந்த காவல்துறையினர் பால் வேன் ஓட்டுனர் பாண்டியன் என்பவரை கைது செய்து விசாரணை மேற்கொண்டு வருகின்றனர்.