சேலம் அஸ்தம்பட்டி பகுதியில் மசாஜ் சென்டர் நடத்தி வந்த தேஜ்மண்டல் என்ற மாற்றுத்திறனாளி பெண் கடந்த அக்டோபர் 15-ஆம் தேதி அவரின் வீட்டில் சூட்கேசில் சடலமாக கண்டெடுக்கப்பட்டார். அந்தக் கொலை தொடர்பாக மாநகர காவல்துறையினர் தீவிர விசாரணை மேற்கொண்டு வருகின்றனர்.அதன் முதற்கட்ட விசாரணையில் விபச்சாரத்தில் ஏற்பட்ட தொழில் போட்டி காரணமாக அவர் கொலை செய்யப்பட்டதாக கூறப்பட்டது. இதனைத் தொடர்ந்து கொலையாளிகளை கைது செய்ய போலீசார் தீவிர விசாரணை நடத்தி வந்தனர்.
இந்நிலையில் அந்தப் பெண்ணின் செல்போனை ஆய்வு செய்ததில் அஸ்தம்பட்டி காவல் நிலைய உதவி ஆய்வாளர் ஆனந்தகுமார், சிறப்பு காவல் உதவி ஆய்வாளர்கள் கலைச்செல்வன்,சேகர் மற்றும் காவலர் மணிகண்டன் ஆகியோர் பலமுறை அவருடன் செல்போனில் பேசிக் கொண்டிருந்ததும் விபச்சாரம் செய்வது தெரிந்தும் அவர் மீது சட்டப்படி நடவடிக்கை எடுக்காமல் விபச்சாரத்திற்கு துணை போனது தெரிய வந்துள்ளது. இதையடுத்து காவல் உதவி ஆய்வாளர் உட்பட 4 பேரையும் தற்காலிக பணியிடை நீக்கம் செய்து சேலம் மாநகர காவல் ஆணையர் உத்தரவிட்டுள்ளார். இந்த சம்பவம் சேலம் மாநகர காவல் துறையினர் மத்தியில் பெரும் பரபரப்பை ஏற்படுத்தியுள்ளது.