சுவிட்சர்லாந்தில் இளம்பெண் சடலமாக மீட்கப்பட்ட வழக்கில் மூவர் அதிரடியாக கைது செய்யப்பட்டுள்ளனர்.
சுவிட்சர்லாந்தில் உள்ள துர்காவ் மண்டலத்தில் Zezikon என்ற கிராமம் உள்ளது. இந்த கிராமத்தில் உள்ள வனப்பகுதியில் கடந்த 2018ஆம் வருடம் ஜனவரி மாதம் இளம்பெண்ணின் உடல் மீட்கப்பட்டுள்ளது. மேலும் காவல்துறையினர் மேற்கொண்ட விசாரணையின் அடிப்படையில் இசபெல்லா என்ற 20 வயதுடைய பெண் தான் சடலமாக மீட்கப்பட்டது தெரியவந்துள்ளது.
ஆனால் பிரேத பரிசோதனையில் அப்பெண் தற்கொலை செய்துகொண்டாரா? அல்லது கொலை செய்யப்பட்டாரா? என்பது குறித்து தகவல் உறுதியாக தெரிவிக்கப்படவில்லை என்பதால் விசாரணை அதிகாரிகள் குழப்பத்தில் இருந்தனர். இந்நிலையில் தொடர்ந்து மேற்கொள்ளப்பட்ட விசாரணையின் அடிப்படையில், இசபெல்லா கடந்த 2017ஆம் வருடம் நவம்பர் 3ஆம் தேதி அன்று உயிரிழந்துவிட்டதாக தகவல் வெளியாகியுள்ளது.
மேலும் நெதர்லாந்து நாட்டைச் சேர்ந்த 36 வயதுள்ள நபர் ஒருவரின் வீட்டில் இச்சம்பவம் நடந்த அன்று இசபெல்லா இருந்துள்ளதாக கூறப்பட்டுள்ளது. அதாவது இசபெல்லா தன் உறவினர் ஒருவரின் மூலமாக அந்த நபரை சந்தித்ததாக தெரியவந்துள்ளது. இதனைத்தொடர்ந்து இசபெல்லா உயிரிழந்தவுடன் அந்த நபர் அவருக்கு நெருக்கமான நண்பர்கள் இருவரை அழைத்து ஆலோசித்துள்ளார்.
அதன்பின்பு மூவரும் சேர்ந்து ஒரு போர்வை மற்றும் கம்பளத்தில் உடலை சுருட்டி காரில் கொண்டுசென்று Zezikon என்ற கிராமத்தில் இருக்கும் வனப்பகுதி ஒன்றில் மறைத்துள்ளனர். இதனால் மூவர் மீதும் வழக்குப் பதிவு செய்யப்பட்டதுடன் இந்த வழக்கின் முக்கிய குற்றவாளி நெதர்லாந்து நாட்டைச் சேர்ந்த நபர் தான் என்பதால் அவர் மீது பலாத்காரம், கொலை முயற்சி மற்றும் ஆயுதங்கள், மருந்துகள் குறித்த சட்டத்தை மீறியது போன்ற பல பிரிவுகளின் கீழ் வழக்குப்பதிவு செய்யப்பட்டு கைது செய்யப்பட்டுள்ளார்கள்.