இந்திய கிரிக்கெட் அணியின் ஹிட்மேன் என அழைக்கப்படும் ரோகித் சர்மா மெக்ராத் என்ற வேகப்பந்துவச்சாளரின் பந்துகளை எதிர்கொள்ள வேண்டும் என தெரிவித்துள்ளார்.
இந்திய கிரிக்கெட் ரசிகர்களால் மிகவும் கவரப்பட்டு ஹிட்மேன் என அழைக்கப்படும் ரோகித் சர்மா நேற்று ட்விட்டர் பக்கத்தில் ரசிகர்களின் கேள்விகளுக்கு பதில் கொடுத்துவந்தார். அப்போது ரசிகர் ஒருவர், ” கடந்த காலங்களில் இருந்து ஒரு பந்துவீச்சாளரை எதிர்கொள்ள வேண்டும் என்றால் நீங்கள் யாரை தேர்வு செய்வீர்கள்” என கேள்வி கேட்டார். அந்தக் கேள்விக்கு ஹிட்மேன் ரோகித் சர்மா, “மெக்ராத்தின் பந்துவீச்சை எதிர்கொள்ள எனக்கு விருப்பம்” என பதில் கூறினார். ஆஸ்திரேலியாவின் மெக்ராத், இந்தியாவின் ரோகித் சர்மா இவர்கள் இருவரும் உலகக்கோப்பை தொடர்களில் சாதனை படைத்துள்ளனர் என்பது குறிப்பிடத்தக்கது.
உலகக்கோப்பை தொடர்களில் அதிக விக்கெட்டுகளை (71) வீழ்த்திய பந்துவீச்சாளர் என்ற சாதனையை மெக்ராத் பெற்றுள்ளார். அதுமட்டுமில்லாமல் வெஸ்ட் இண்டீஸில் நடைபெற்ற 2007ஆம் ஆண்டு உலகக்கோப்பை தொடரில் அதிகபட்சமாக 26 விக்கெட்டுகளை வீழ்த்தி தொடர்நாயகன் என்ற விருதை தட்டிச் சென்றார். 1999ஆம் ஆண்டு முதல் 2007ஆம் ஆண்டு வரை டெஸ்ட், ஒருநாள் என இரண்டு விதமான ஃபார்மெட்டுகளிலும் ஆஸ்திரேலிய அணி கோலோச்சி இருந்ததற்கு மெக்ராத் அஸ்திவாரமாக இருந்தார். மேலும் தேவை 124 டெஸ்ட் போட்டிகளில் 563 விக்கெட்டுகளும், 250 ஒருநாள் போட்டிகளில் 381 விக்கெட்டுகளும் கைப்பற்றியுள்ளார்.
அதேபோல் மறுபக்கம், ரோகித் சர்மா ஒரு உலகக்கோப்பை தொடரில் அதிக சதங்களை விளாசிய பேட்ஸ்மேன் என்ற சாதனையை படைத்திருந்தார். கடந்த வருடம் இங்கிலாந்தில் நடைபெற்ற இந்தத் தொடரில் இவர் ஐந்து சதங்களை எடுத்து இந்தச் சாதனையை நிகழ்த்தினார். 33 வயது கொண்ட ரோகித் சர்மா இந்திய அணிக்காக இதுவரை 224 ஒருநாள், 108 டி20, 32 டெஸ்ட் என மொத்தம் 14,029 ரன்களைக் குவித்துள்ளார். ஒருநாள் போட்டிகளில் மூன்றுமுறை இரட்டை சதம் அடித்த ஒரே வீரர் இவர்தான் என்ற சாதனையையும் படைத்துள்ளார் என்பது குறிப்பிடத்தக்கது.