சிவகங்கை மாவட்டம் சிங்கம்புணரி அருகே கணவன்-மனைவி தாக்கப்பட்டதை கண்டித்து சாலை மறியலில் ஈடுபட்டவர்கள் 10 பேர் மீது காவல்துறையினர் வழக்குப்பதிவு செய்துள்ளனர்.
சிவகங்கை மாவட்டத்தில் உள்ள மல்லாக்கோட்டையில் ராமகிருஷ்ணன் என்பவர் வசித்து வருகிறார். இவருக்கு முத்து என்ற சித்தப்பாவும், ராஜம்மாள் என்ற சித்தியும் உள்ளனர். இவர்கள் சில கருத்து வேறுபாடு காரணமாக பிரிந்து வாழ்ந்து வருகின்றனர். ராமகிருஷ்ணனுக்கும், முத்துவுக்கும் கோர்ட்டில் சொத்து தகராறு காரணமாக வழக்கு நிலுவையில் உள்ளது. இந்நிலையில் நேற்று காலை ராமகிருஷ்ணன் வீட்டுக்கு முத்துவின் தங்கை மகன் விஜய்ஆனந்த் சென்றுள்ளார். அங்கு அவரது மனைவி அகிலாவை தாக்கியுள்ளார். அதில் அவருக்கு தலையில் பலத்த காயம் ஏற்பட்டது. அதோடு மட்டுமல்லாமல் கிருஷ்ணனையும் தாக்கி கொலை மிரட்டல் விடுத்ததாக கூறப்படுகிறது.
அதில் பலத்த காயமடைந்த இருவரும் சிகிச்சைக்காக சிவகங்கை அரசு மருத்துவமனையில் அனுமதிக்கப்பட்டனர். இது குறித்து அறிந்த ராமகிருஷ்ணனின் உறவினர்கள் ஏரியூரிலிருந்து கீழ்வளவு செல்லும் சாலையில் கற்களை போட்டு சாலை மறியலில் ஈடுபட்டனர். இதுகுறித்து தகவலறிந்து வந்த காவல்துறையினர் அவர்களிடம் பேச்சுவார்த்தை நடத்தினர். மேலும் மறியலில் ஈடுபட்டுக் கொண்டிருந்தவர்களை கலைந்து போகுமாறு கூறினர். கணவன்-மனைவி இருவரையும் தாக்கியதாக 7 பேர் மீது காவல் நிலையத்தில் புகார் அளிக்கப்பட்டது. மேலும் சாலை மறியலில் ஈடுபட்டதாக 10 பேர் மீது காவல்துறையினர் வழக்குப்பதிவு செய்தனர்.