கஜகஸ்தானில் உள்ள பைகோனுர் ஏவுதலத்தில் இருந்து ஈரானின் செயற்கை கோளை ரஷ்யா செவ்வாய்க்கிழமை அன்று விண்ணில் செலுத்தியுள்ளது. பன்னிரண்டாம் நூற்றாண்டின் பாரசீக விஞ்ஞானியின் பெயரிடப்பட்ட கயான் செயற்கைகோளை ரஷ்யா கஜகஸ்தானில் உள்ள பைகோநூர் ஏவுதளத்திலிருந்து செலுத்தி அதற்கான சுற்றுவட்டப் பாதையில் நிலை நிறுத்தி இருக்கிறது. மேலும் இந்த செயற்கைக்கோள் விவசாய உற்பத்தியை மேம்படுத்த பயன்படுத்தப்படும் என தெரிவித்து வரும் நிலையில் உக்ரைனை கண்காணிப்பதற்கு ரஷ்யா இதை பயன்படுத்தும் மற்றும் இஸ்ரேலை கண்காணிக்க ஈரான் இதனை பயன்படுத்தும் என்ற அச்சமும் எழுப்பப்பட்டிருக்கிறது.
இது தொடர்பாக மேற்கத்திய பாதுகாப்பு அதிகாரிகள் கடந்த வாரம் வாஷிங்டன் போஸ்ட்டிடம் கூறியுள்ள கருத்தில் கயம் செயற்கைக்கோளில் உக்ரைனில் உள்ள ராணுவ இலக்குகளை கண்காணிக்க உயர் தெளிவு திறன் கொண்ட கேமராவை பயன்படுத்த போவதாக ரஷ்யா ஈரானிடம் தெரிவித்திருப்பதாக கூறியுள்ளனர். மேலும் இதன் மூலமாக இஸ்ரேல் மற்றும் மத்திய கிழக்கு பகுதிகளை கண்காணிக்க ஈரானுக்கு முன்னோடியில்லாத திறனும் வழங்கப்படும் என கூறியுள்ளனர். விண்ணில் செலுத்தப்பட்ட செயற்கைக்கோள் மேற்கத்திய நாடுகளுடன் ரஷ்யா தனது விண்வெளி ஒத்துழைப்பை முறித்துள்ள நிலையில் வந்திருக்கின்றது. அடுத்த இரண்டு வருடங்களில் ரஷ்யா சர்வதேச விண்வெளி நிலையத்தில் இருந்து ரஷ்யா வெளியேறும் என ரோஸ் கோஸ்மோஸின் தலைவராக சமீபத்தில் நியமிக்கப்பட்ட யூரி போரிசோவ் கடந்த மாதம் அறிவித்திருந்தது குறிப்பிடத்தக்கதாகும்