பொங்கல் பண்டிகையை முன்னிட்டு சென்னை சேப்பாக்கம்-திருவல்லிக்கேணி தொகுதியில் சிந்தாதிரிப்பேட்டையில் மக்களுக்கு வேஷ்டி சேலை உள்ளிட்ட பொருள்களை உதயநிதி ஸ்டாலின் வழங்கினார். இதையடுத்து செய்தியாளர்களை சந்தித்து பேசிய அவர், புத்தாண்டு, பொங்கல், தமிழர் திருநாள் நல்வாழ்த்துக்களை தெரிவித்துக் கொள்கிறேன். இன்று தை பிறந்துள்ளது. அரசியல் பணி, திரையுலகில் இலக்கு எதுவும் உள்ளதா? என்று கேட்கிறீர்கள். எனக்கு இலக்கு என்று எதுவும் இல்லை. எனது வேலையை நான் பார்த்துக்கொண்டு இருக்கிறேன்.
திமுக தலைவர் ஸ்டாலின் சொல்வதை செய்து கொண்டு இருக்கிறேன். என்னால் முடிந்த அளவுக்கு மக்கள் பணியாற்றிக் கொண்டு வருகிறேன் என்று கூறினார். அப்போது செய்தியாளர்கள், தை பிறந்தால் வழி பிறக்கும், எங்களுக்கு வழி பிறக்குமா? என்று கேள்வி கேட்டனர். அதற்கு அவர், ஏன்? எனக்கு ஏற்கனவே நல்ல வழி தானே இருக்கிறது. அதில் என்ன குறை கண்டீர்கள் என்று நச்சென்று பதிலளித்தார். உதயநிதி ஸ்டாலின் எந்த நேரத்திலும் அமைச்சரவையில் இடம் பிடிக்கலாம் என்கின்ற எதிர்பார்ப்பு தமிழக அரசியலில் நிலவி வருகிறது. இந்த விவகாரத்தில் திமுக மேலிடம் மௌனம் காத்து வருவது குறிப்பிடத்தக்கது.