மர்ம நபர்கள் தொழிலாளியை அடித்து கொலை செய்து சடலத்தை தண்டவாளத்தில் வீசி சென்ற சம்பவம் பெரும் பரபரப்பை ஏற்படுத்தியுள்ளது.
சென்னை மாவட்டத்திலுள்ள திருவொற்றியூர் கார்கில் நகரில் கட்டிட தொழிலாளியான சீனிவாசன் என்பவர் வசித்து வந்துள்ளார். இவர் மீது காவல் நிலையங்களில் பல்வேறு குற்ற வழக்குகள் நிலுவையில் இருக்கிறது. இந்நிலையில் இரவு 11 மணி அளவில் 6 பேர் கொண்ட மர்ம கும்பல் சீனிவாசனை வீட்டிலிருந்து அழைத்து சென்றுள்ளனர். அதன்பிறகு சீனிவாசன் வீட்டிற்கு திரும்பி வரவில்லை. இந்நிலையில் உடல் துண்டிக்கப்பட்ட நிலையில் திருவொற்றியூர் சடயங்குப்பம் பாட்டை அருகே இருக்கும் ரயில்வே தண்டவாளத்தில் சடலம் கிடப்பதாக பொதுமக்கள் காவல்துறையினருக்கு தகவல் தெரிவித்துள்ளனர். அந்த தகவலின் படி காவல்துறையினர் சம்பவ இடத்திற்கு விரைந்து சென்று பார்த்தபோது சடலமாக கிடந்தவர் சீனிவாசன் என்பது தெரியவந்துள்ளது.
இதனையடுத்து காவல்துறையினர் சீனிவாசனின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். இது குறித்து வழக்குப்பதிவு செய்த காவல்துறையினர் நடத்திய விசாரணையில் சீனிவாசனை அழைத்து சென்ற மர்ம நபர்கள் அவரை அடித்து கொலை செய்துள்ளனர். அதன்பிறகு சீனிவாசனின் சடலத்தை தண்டவாளத்தின் மீது போட்டதால் ரயில்கள் ஏறி இறங்கி உடல் துண்டாகி கிடந்தது தெரியவந்துள்ளது. இதனையடுத்து சீனிவாசனை கொலை செய்த மர்ம நபர்களை காவல்துறையினர் வலைவீசி தேடி வருகின்றனர்.