பட்டப்பகலில் வீடுபுகுந்து திருடிய மர்ம நபரை காவல்துறையினர் வலைவீசி தேடி வருகின்றனர்.
புதுக்கோட்டை மாவட்டத்திலுள்ள கந்தர்வகோட்டையில் ஹக்கீம் என்பவர் வசித்து வருகிறார். இவர் கறிக்கடை வைத்து நடத்தி வருகிறார். இவரும் இவரது மனைவியும் வீட்டை பூட்டிவிட்டு பக்கத்து தெருவில் உள்ள தனது உறவினர் வீட்டிற்கு சென்றுள்ளனர். அதன்பின் மாலை 5 மணி அளவில் அங்கிருந்து கிளம்பி தங்களது வீட்டிற்கு வந்து பார்த்தபோது கதவில் உள்ள பூட்டுகள் உடைக்கப்பட்டிருந்ததை கண்டு அதிர்ச்சியடைந்தனர். அதன்பின்உள்ளே சென்று பார்த்தபோது பீரோவில் இருந்த 66 பவுன் நகைகள் மற்றும் ரூபாய் 3 லட்சத்து 70 ஆயிரம் ரொக்கம் ஆகியவாற்றை மர்ம நபர்கள் திருடி சென்றது தெரியவந்துள்ளது.
இந்த சம்பவம் குறித்து ஹக்கீம் காவல்நிலையத்தில் புகார் அளித்துள்ளார். அந்த புகாரின் பேரில் காவல்துறையினர் சம்பவ இடத்திற்கு சென்று விசாரணை நடத்தியுள்ளனர். மேலும் கைரேகை நிபுணர்கள் அங்கு பதிவான தடையங்களை சேகரித்தனர். இதனையடுத்து காவல்துறையினர் அப்பகுதியில் பொருத்தப்பட்டிருந்த கண்காணிப்பு கேமராக்களின் காட்சிகளை ஆய்வு செய்து விசாரணை மேற்கொண்டு வருகின்றனர்.