“கிஃப்ட் ஆஃப் லைஃப் அட்வென்சா் ஃபவுண்டேஷன்” எனும் அமைப்பு உச்சநீதிமன்றத்தில் பொது நல மனு ஒன்றை தாக்கல் செய்தது. அதில் “உடல் உறுப்பு மாற்று அறுவை சிகிச்சை குறித்த விதிகளில் பொதுவான தன்மை இல்லை. இதனால் உறுப்புகளை தானமாக பெறுவதற்காக பதிவுசெய்ய வேண்டுவோா் 10 -15 வருடங்கள் அம்மாநிலத்தில் வசித்ததற்கான இருப்பிடச் சான்றிதழை வழங்க வேண்டும் எனும் நிபந்தனையை சில மாநிலங்கள் கட்டாயமாக்கி இருக்கிறது. ஆகவே மனித உடல் உறுப்புகள் மற்றும் திசுகள் மாற்று அறுவைசிகிச்சை சட்டம், 1994ன் கீழ் பொதுவான விதிகளைக் கொண்ட விதிமுறைகளை வகுக்குமாறு மாநிலங்களுக்கு உத்தரவிட வேண்டும்” என மனுவில் குறிப்பிட்டிருந்தார்.
இந்த மனு உச்சநீதிமன்ற தலைமை நீதிபதி டி.ஒய்.சந்திரசூட் மற்றும் நீதிபதி பி.எஸ்.நரசிம்மா போன்றோர் அடங்கிய அமா்வுக்கு முன் விசாரணைக்கு வந்தது. இந்நிலையில் நீதிபதிகள் “நாங்கள் உங்கள் மனுவை நிராகரிக்கவில்லை. இந்த விவகாரம் மத்திய சுகாதாரம் மற்றும் குடும்பநல அமைச்சகத்தால் ஆராயப்படும். தகுந்த காரணத்தின் அடிப்படையில் கூடியவிரைவில் கொள்கை முடிவு மேற்கொள்ளப்படும்” எனக் கூறி அந்த மனுவை தள்ளுபடி செய்தனா்.