நாடு முழுவதும் கொரோனா பரவலை கட்டுப்படுத்த மத்திய மற்றும் மாநில அரசுகள் பல்வேறு நடவடிக்கைகளை மேற்கொண்டு வருகின்றன. அதன் முக்கிய பகுதியாக பெரும்பாலான மாநிலங்களில் முழு ஊரடங்கு அமலில் உள்ளது. சில மாநிலங்களில் கொரோனா பாதிப்பு குறைந்து வந்தாலும், கொரோனா முழுமையாகக் கட்டுக்குள் வரும் வரை ஊரடங்கு தொடரும் என மாநில அரசுகள் தெரிவித்து வருகிறது. அதன்படி சில தளர்வுகள் அளிக்கப்பட்டு ஊரடங்கு நீட்டிக்கப்பட்டு வருகிறது.
இந்நிலையில் கொரோனா பரவல் காரணமாக புதுச்சேரியில் கடந்த மூன்று மாதங்களாக மூடப்பட்டிருந்த திரையரங்குகள் இன்று மீண்டும் திறக்கப்பட்டுள்ளது. கடந்த ஆகஸ்ட் 1-ஆம் தேதி வெளியான அறிவிப்பை அடுத்து 50% இருக்கைகளுடன் திரையரங்குகள் இயங்குகிறது. புதிய படங்கள் எதுவும் வெளியாகாத நிலையில் கர்ணன், காங் vs காட்ஷில்லா, டாம் அண்ட் ஜெர்ரி போன்ற படங்கள் திரையிடப்படுகிறது.