ஊராட்சி மன்ற தலைவர் கொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது.
கிருஷ்ணகிரி மாவட்டத்தில் உள்ள பி.பி பாளையம் கிராமத்தில் நரசிம்மமூர்த்தி(46) என்பவர் வசித்து வந்துள்ளார். இவர் தாரவேந்திரம் ஊராட்சி மன்ற தலைவராக இருந்து வந்துள்ளார் மேலும் இந்திய கம்யூனிஸ்ட் கட்சியின் முன்னாள் மாவட்ட குழு உறுப்பினரான நரசிம்மமூர்த்தி தற்போது தளி தொகுதி கமிட்டி உறுப்பினராக இருக்கிறார். நேற்று நரசிம்மமூர்த்தி மோட்டார் சைக்கிளில் கடைக்கு சென்று பொருட்களை வாங்கிவிட்டு ஊருக்கு வந்து கொண்டிருந்தார். அப்போது நரசிம்மமூர்த்தியை பின் தொடர்ந்து வந்த மர்ம நபர்கள் மோட்டார் சைக்கிளை வழிமறித்து கட்டை மற்றும் கற்களால் அவரை சரமாரியாக தாக்கி விட்டு தப்பி சென்றனர்.
இதனால் படுகாயமடைந்த நரசிம்ம மூர்த்தி சம்பவ இடத்திலேயே பரிதாபமாக உயிரிழந்தார். இதுகுறித்து அறிந்த போலீசார் நரசிம்ம மூர்த்தியின் உடலை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர். இந்த சம்பவம் குறித்து வழக்கு பதிவு செய்த போலீசார் மர்ம நபர்களை தீவிரமாக தேடி வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.