ரயிலில் 14 கிலோ கஞ்சாவை கடத்தி வந்த ஒடிசா மாநில வாலிபரை காவல்துறையினர் கைது செய்துள்ளனர்.
வண்டி எண்-13351 கொண்ட தான்பாத் – ஆலப்புழா எக்ஸ்பிரஸ் ரயில் ஜார்க்கண்ட் மாநிலத்தில் இருந்து கேரளா மாநிலத்திற்கு சென்றுகொண்டிருந்தபோது ரயில்வே போலீஸ் ஏட்டு ராமன் தலைமையில் காவல்துறையினர் கண்ணன், சென்னகேசவன், சதீஷ்குமார், கவியரசு, சக்திவேல் ஆகியோர் கொண்ட தனிப்படை போலீசார் சோதனையில் ஈடுபட்டார்கள். ஜோலார்பேட்டை ரயில் நிலையத்தில் ஆரம்பித்து ஒவ்வொரு பெட்டியாக சோதனை செய்து பார்த்து வந்த போது ரயில் பொம்மிடி வரும்போது எஸ்-11 பெட்டியில் சந்தேகப்படும்படி ஒரு நபர் இருந்துள்ளார்.
அவரை பிடித்து காவல்துறையினர் விசாரணை மேற்கொண்டனர். அப்போது அவர் வைத்திருந்த பையை திறந்து பார்த்தபோது அதில் 14 கிலோ கஞ்சா இருந்ததை கண்டுபிடித்தார்கள். இதையடுத்து அவரிடம் மேலும் விசாரணை நடத்தியதில் ஒடிசா மாநிலம் தண்டபாடி நிலபடா பகுதியில் வசித்துவரும் தாஸ் வடகா(20) என்பது தெரியவந்துள்ளது. இதையடுத்து அவரை கைது செய்து அவரிடம் இருந்த 14 கிலோ கஞ்சாவை காவல்துறையினர் பறிமுதல் செய்தனர். அதன் பின்னர் அவர் சேலம் ரயில்வே காவல் நிலையத்தில் ஒப்படைக்கப்பட்டு காவல்துறையினர் வழக்கு பதிந்து விசாரணை மேற்கொண்டு வருகின்றனர்.