நகைகளை திருடிய 2 பேரை காவல்துறையினர் கைது செய்துள்ளனர்.
ஈரோடு மாவட்டத்தில் உள்ள காவிரி சாலை பகுதியில் தனியாருக்கு சொந்தமான நகை கடை ஒன்று உள்ளது. இந்த நகை கடைக்கு கடந்த 17-ஆம் தேதி 2 பெண்கள் நகை வாங்குவதற்காக வந்துள்ளனர். அப்போது அந்த பெண்கள் தங்க நாணயம் வேண்டும் என கடை ஊழியர்களிடம் கூறியுள்ளனர். இதனைக் கேட்ட கடை ஊழியர்கள் தங்க நாணயங்களை காண்பித்துள்ளனர். ஆனால் அவர்கள் நகை எதுவும் வாங்காமல் சென்றுவிட்டனர். இந்நிலையில் சிறிது நேரத்தில் கடை ஊழியர்கள் நகைகளை சோதனை செய்த போது 2 நாணயங்கள் திருட்டு போனது தெரியவந்தது.
இதனை பார்த்து அதிர்ச்சி அடைந்த ஊழியர்கள் கடையில் பொருத்தப்பட்டிருந்த சிசிடிவி கேமராவில் பதிவான காட்சிகளை ஆய்வு செய்தனர். அதில் கடைக்கு நகை வாங்க வந்த அந்த பெண்கள் நகைகளை திருடி சென்றது பதிவாகியுள்ளது. இதுகுறித்து கடை மேலாளர் காவல் நிலையத்தில் புகார் அளித்துள்ளார். அந்த புகாரின் பேரில் வழக்குப்பதிவு செய்த காவல்துறையினர் நடத்திய விசாரணையில் நகையை திருடியது பானுமதி, புஷ்பா ஆகியோர் என்பது தெரியவந்துள்ளது. இதனையடுத்து 2 பேரையும் காவல்துறையினர் கைது செய்து தீவிர விசாரணை மேற்கொண்டு வருகின்றனர்.