எதிர்க்கட்சிகளின் அமளி காரணமாக மூன்றாவது நாளாக நடந்து வரும் நாடாளுமன்ற இரு அவைகளும் பிற்பகல் 2 மணி வரை ஒத்திவைக்கப்பட்டுள்ளது.
நாடாளுமன்ற மழைக்கால கூட்டத்தொடர் கடந்த 19ஆம் தேதி தொடங்கி ஆகஸ்ட் 13ஆம் தேதி வரை நடைபெற உள்ளது. இந்த கூட்டத்தொடரில் பெகாசஸ் உளவு மென்பொருள் விவகாரம் மிகப்பெரிய பிரச்சனையாக வெடித்துள்ளது. இந்த பிரச்சனை குறித்து நாடாளுமன்ற கூட்டுக்குழு விசாரணைக்கு உத்தர விடும்படி வலியுறுத்தி, எதிர்க்கட்சிகள் கடும் அமளியில் ஈடுபட்டு வருகின்றன. கடந்த 3 நாட்களாக மக்களவை முடங்கியது.
எதிர்க்கட்சிகள் அமளியில் ஈடுபட்டதால், நாடாளுமன்ற இரு அவைகளும் பகல் 12 மணிவரை ஒத்தி வைக்கப்பட்டிருந்தது. 12 மணிக்கு மீண்டும் அவை கூடிய பிறகு எதிர்க்கட்சிகள் தொடர்ந்து அமளியில் ஈடுபட்டனர். இதன் காரணமாக நாடாளுமன்ற இரு அவைகளும் பிற்பகல் 2 மணி வரை ஒத்திவைக்கப்பட்டுள்ளது. மேலும் வேளாண் சட்டங்களுக்கு எதிர்ப்பு தெரிவித்து டெல்லியில் விவசாயிகள் போராட்டம் நடத்தி வரும் நிலையில், நாடாளுமன்ற வளாகத்தில் விவசாயிகள் போராட்டத்திற்கு ஆதரவாக ராகுல் காந்தி தலைமையில் காங்கிரசார் போராட்டத்தில் ஈடுபட்டு வருகின்றனர்.