மதுரை விமான நிலையத்திற்கு வித்தியாசமான முறையில் 4 பார்சல்கள் வந்ததால் சற்று நேரம் பரபரப்பு நிலவியது.
மதுரை விமான நிலையத்தில் உள்ள சரக்கு முனையத்தில் இருந்து பல்வேறு பகுதிகளுக்கு சரக்குகள் அனுப்பப்பட்டு வருகின்றன. இந்நிலையில் நெல்லையில் இருந்து டெல்லிக்கு அனுப்புவதற்காக 4 பார்சல்கள் மதுரை விமான நிலையத்திற்கு வந்தது. இந்த 4 பார்சல்கள் வித்தியாசமாக வடிவமைக்கப்பட்டு இருந்ததால் சந்தேகமடைந்த பணியாளர்கள் அந்த பார்சலை சோதனை செய்த போது அதில் ஒயர் போன்ற பொருட்கள் இருந்துள்ளது.
இதனையடுத்து வெடிகுண்டு தடுப்பு பிரிவினருக்கு தகவல் தெரிவிக்கப்பட்டு அந்த 4 பர்சல்களையும் பாதுகாப்பான முறையில் மணல் மூட்டைகள் அடுக்கி வைக்கப்பட்ட இடத்தில் வைத்து சோதனை செய்துள்ளனர். அப்போது அந்த பார்சலில் சார்ஜர் ஒயர்கள், டைரிகள், பரிசு பொருட்கள், விளையாட்டு பொருட்கள் போன்றவை இருந்துள்ளது.
மேலும் வெடிக்கும் தன்மை கொண்ட பொருட்கள் இல்லை என்று உறுதி செய்யப்பட்ட பின்னர் அந்த பார்சல்களை அனுப்பிய நபரை தொடர்புகொண்டு இதுபோன்ற பொருட்களை விமானத்தில் அனுப்ப அனுமதி கிடையாது என தெரிவித்தனர். இதற்குப்பிறகு அந்த பார்சல்களை ரயில் மூலம் டெல்லிக்கு அனுப்ப ஏற்பாடு செய்தனர். இச்சம்பவம் விமான நிலையத்தில் சற்று பரபரப்பை ஏற்படுத்தியுள்ளது.